Şrift ölçüsü:

21 Oktyabr 2025

İran İslam Respublikasının Ali Rəhbəri ABŞ-də müxtəlif ştat və şəhərlərdə Donald Trampa qarşı keçirilən 7 milyonluq etiraz aksiyalarına toxunaraq bildirib: Siz əgər doğrudan da bacarıqlısınızsa, yalan və təxribat yaymaq, digər ölkələrin daxili işlərinə qarışmaq və orada hərbi bazalar yaratmaq əvəzinə, bu milyonlarla insanı sakitləşdirin və evlərinə qayıtmağa vadar edin.

Ayətullah Seyid Əli Xamenei bu gün səhər müxtəlif idman növləri üzrə çempionlar və beynəlxalq elmi olimpiadalarda medal qazananlarla görüşdə ABŞ prezidentinin son dövrlərdəki təkəbbürlü və əsassız bəyanatlarına toxunaraq deyib:
Bu şəxs bölgə, İran və İran xalqı barədə söylədiyi saysız yalanlarla və yersiz davranışları ilə sionistlərə ruh verməyə və özünü güclü göstərməyə çalışdı. Amma əgər doğrudan da gücü varsa, qoy gedib ABŞ-nin bütün ştatlarında ona qarşı şüar səsləndirən milyonlarla insanı sakitləşdirsin.


Ali Rəhbər ölkənin idman və elm sahəsində parlayan gənclərinin uğurlarından məmnunluq ifadə edərək deyib:
Sizin qazandığınız medallar əvvəlki dövrlərin medallarına nisbətən daha böyük dəyərə malikdir. Çünki siz bu nailiyyətləri elə bir vaxtda əldə etmisiniz ki, düşmən yumşaq müharibə vasitəsilə xalqı ruhdan salmağa, öz gücünə inamını sarsıtmağa çalışır. Lakin siz bu xalqın iradə və qüdrətini nümayiş etdirərək ona ən möhkəm cavabı verdiniz.


Ayətullah Xamenei düşmənlərin İranın elmi inkişafını ləngitmək səylərinə də diqqət çəkərək bildirib:
İran xalqının düşmənləri bəzən uğurları inkar etməklə, bəzən yalan və həqiqəti bir-birinə qatmaqla, bəzi xırda qüsurları şişirtməklə və məqsədli təbliğatla ölkədə qaranlıq bir mənzərə yaratmağa çalışırlar. Amma siz elm və idman zirvələrinə qalxaraq ölkənin parlaq gələcəyini bütün dünyaya göstərdiniz.


Ali Rəhbər çıxışının başqa bir hissəsində ABŞ prezidentinin bölgə və İran haqqında son bəyanatlarına cavab verərək deyib:
ABŞ prezidenti işğal olunmuş Fələstinə səfəri zamanı bir sıra mənasız və gülünc sözlər deməklə ruhdan düşmüş sionistləri ümidləndirməyə çalışdı.


O, 12 günlük müharibədə İran İslam Respublikasının sionist rejimə vurduğu inanılmaz zərbəni onların ruh düşkünlüyünün əsas səbəbi adlandıraraq əlavə edib:
Sionistlər gözləmirdilər ki, İran istehsalı olan raketlər alov və od içində onların mühüm və həssas mərkəzlərinə çatsın, həmin obyektləri dağıdıb külə döndərsin.


Ayətullah Xamenei vurğulayıb:
Bu raketlər nə ayrı ölkədən alınmış, nə də kirayəyə götürülmüşdür — onların hamısı iranlı gənclərin öz əlləri ilə hazırlanıb və hər biri İran elminin məhsuludur. Gənc iranlı elmə söykənərək böyük işlərə imza atmağa qadirdir.


O, əlavə edib: Bu raketlər ordumuz və hərbi sənayemiz tərəfindən hazırlanıb və istifadə olunub. Bizdə hələ kifayət qədər raket var və lazım gələrsə, yenidən istifadə ediləcək.


Ali Rəhbər Trampın son bəyanatlarını sionistlərə mənəvi dəstək vermək məqsədilə səsləndirdiyini bildirərək deyib:
Qəzza müharibəsində ABŞ, sionist rejimin cinayətlərinin əsas şərikidir. ABŞ prezidenti özü də etiraf etdi ki, biz Qəzzada bu rejimlə birlikdə hərəkət edirdik. Əslində bunu deməsəydi belə, hamıya aydındır — çünki Qəzzanın mülki əhalisinin başına atılan silah və sursatların hamısı Amerikaya məxsus idi.


Ayətullah Xamenei Trampın “terrorla mübarizə aparırıq” iddiasını da yalan adlandıraraq qeyd edib:
Qəzza müharibəsində 20 mindən çox uşaq və körpə şəhid olub. Onlar terrorçu idilərmi? Terrorçu, İŞİD-i yaradan və bölgəyə buraxan Amerikadır. İndi də onun qalıqlarını öz maraqları üçün istifadə edirlər.


Ali Rəhbər əlavə edib:
Qəzzada 70 mindən çox insanın qətli və 12 günlük müharibədə minlərlə iranlının şəhadəti ABŞ və sionist rejimin terrorçu xislətinin açıq göstəricisidir. Onlar yalnız mülki insanları deyil, elm adamlarımız — Tehrançi və Abbasi kimi alimləri də terror etdilər və bu cinayəti fəxrlə etiraf etdilər. Amma bilməlidirlər ki, elmi terror etmək mümkün deyil.

İran İslam İnqilabının Ali Rəhbəri Ayətullah Seyyid Əli Xamenei ABŞ prezidentinin “İranın nüvə sənayesini bombalayaraq məhv etdik” sözlərinə münasibət bildirərək deyib:
Fərqi yoxdur, qoy elə bu xəyalla yaşasınlar. Amma ümumiyyətlə, siz kimsiniz ki, hansısa ölkənin nüvə sənayesinə sahib olub-olmaması barədə hökm verəsiniz? İranın nüvə imkanları və sənayesi ABŞ-yə heç bir aidiyyəti yoxdur. Bu cür müdaxilələr əsassız, yanlış və güc tətbiq etmə xarakter daşıyır.


Ali Rəhbər ABŞ-nin müxtəlif ştat və şəhərlərində keçirilən 7 milyonluq etiraz aksiyalarına toxunaraq bildirib:
Əgər doğrudan da gücünüz çatırsa, yalan və təxribat yaymaq, başqa ölkələrin işlərinə qarışmaq və orada hərbi bazalar tikmək əvəzinə, bu milyonlarla insanı sakitləşdirin və evlərinə qaytarın.


Ayətullah Xamenei vurğulayıb ki, “terrorçu və terrorizmin əsl simvolu ABŞ-dir” və Trampın “İran xalqının dostuyam” iddiasını da yalan adlandıraraq deyib:
ABŞ-nin tətbiq etdiyi ikinci dərəcəli sanksiyalar birbaşa İran xalqına qarşı yönəlib. Bir çox ölkələr qorxudan bu sanksiyalara qoşulurlar. Bu səbəbdən siz İran xalqının dostu yox, düşmənisiniz.


O, Trampın “mən danışıqlara hazıram” sözlərinə də toxunaraq bildirib:
O deyir ki, mən razılaşma tərəfdarıyam. Amma əgər bu razılaşma təzyiq və şərtlərlə müşayiət olunursa və nəticəsi əvvəldən müəyyən edilibsə, bu artıq razılaşma deyil, məcburiyyət və diktədir. İran xalqı heç vaxt bu cür məcburiyyətə boyun əyməyəcək.


Ali Rəhbər ABŞ prezidentinin Qərbi Asiyada (onların terminologiyası ilə “Yaxın Şərqdə”) müharibə və zorakılığın hökm sürdüyü barədə bəyanatına cavab olaraq deyib:
Bu müharibələri siz özünüz yaradırsınız. ABŞ həm terrorun, həm də müharibələrin əsas səbəbkarıdır. Əgər belə olmasaydı, bu qədər hərbi bazanı nə üçün bu bölgədə yerləşdirmisiniz? Burada nə işiniz var? Bu regionun sahibləri onun öz xalqlarıdır. Bu bölgədə baş verən müharibə və ölüm hadisələrinin əsas səbəbi ABŞ-nin mövcudluğudur.


Ayətullah Xamenei çıxışının sonunda qeyd edib:
ABŞ prezidentinin mövqeləri yanlış, bir çox hallarda yalan və zorakı xarakter daşıyır. Bəli, bu zorakılıq bəzi ölkələrə təsir göstərə bilər, amma Allahın izni ilə, İran xalqına heç vaxt təsir etməyəcək.