Бисмилләһир-Раһмәнир-Раһим!
Аллаһа шүкүрләр олсун ки, бизләрә јенидән мәнәви Үчајлыға дахил олмаг, мүбарәк Рәҹәб ајыны јашамаг ләјагәтини нәсиб едиб.
Јашадығымыз Рәҹәб ајы бөјүк фәзиләтләр, әмәлләр, савабларла зәнҝин бир ајдыр. Сөзсүз ки, бу ајда оруҹ тутмаг - ән фәзиләтли әмәлләрдәндир. Амма Рәҹәб ајы јалныз оруҹ тутмаг үчүн нәзәрдә тутулмајыб. Рәҹәб ајы, мүбарәк Рамазан ајы үчүн топарланмаг бахымындан чох бөјүк фүрсәтдир. Рәҹәб ајында ҝүндәлик дуалар да чох өнәмлидир. Амма, илдән-илә бизләр ҝәрәк Рәҹәб ајы үчүн бујурулмуш диҝәр әмәлләрлә дә танышлығымызы артыраг. Рәҹәб ајыны јашајан, дәрк едән кәсләр ҝөзәл олар ки, һәр ил бу ајын ичәрисиндә олан ҝөзәл Ислам маарифиндән јени мөвзулардан бәһрәләнсинләр.
Бүтүн мөвҹудијјәтин саһиби вә малики
Бәли, иншәаллаһ, артыг Үчајлыгдајыг - Рәҹәб, Шәбан вә мүбарәк Рамазан ајлары естафети башлајыб. Бу, сон дәрәҹә мәнәви јүклү бир сәфәрдир. Бу сәфәрдә мәнәви камилләшмә үчүн бөјүк фүрсәтләр вардыр. Бу ајлардан әввәлинҹиси мүбарәк Рәҹәб ајыдыр. Рәҹәб ајы - Аллаһ гонаглығы үчүн сәфәрә һазырлыг ајларындан биринҹисидир. Бу ај - төвбә диләмә, бағышланма истәмә, ләјагәт вә шәрафәт әлдә етмә, јаландан, гејбәтдән, бөһтандан, суи-зәндән, диҝәр гәлби мәрәзләрдән мүалиҹә олунма ајыдыр. Уҹа Аллаһдан истәјимиз будур ки, бу мүбарәк ајын әмәлләриндән бәһрәләнмәји һамымыза нәсиб етсин. Аллаһ Тәала бу мүбарәк ајда мәнәви јүксәлиш әлдә етмәји бүтүн диләјәнләрә гисмәт етсин, иншәаллаһ!
Әзәмәтли бир ајдыр Рәҹәб ајы. Чох јанлыш бир иш оларды ки, бир инсан Рәҹәб ајында јашасын, амма нә етмәлиси һаггында фикирләшмәсин. Инсан неҹә диҝәр ишләрини, өзүнүн диҝәр мәсәләләрини планлашдырыр, һазырлығыны ҝөрүр, елә о ҹүр дә ҝәрәк фөвгәладә мәнәви фүрсәтләр олан бу аја да системли јанашсын. Әҝәр бу ајларын ҝәлиши илә бағлы лазыми арашдырмалары әввәлҹәдән апармаса, бу мәнәви немәтләри гәбул етмәк үчүн вәзијјәтини дүзәнләмәсә, Рамазан ајында Илаһи зијафәтдән гәдәринҹә вә лазымынҹа бәһрәләнә билмәјәҹәк.
Бир вар инсан мүбарәк Рамазан ајыны сәбирсизликлә ҝөзләјир ки, бу ајын бүтүн имканларындан фајдалана билсин вә бу ҝөзләмәни мүбарәк мүгәддимәләрдә - Рәҹәб вә Шәбан ајларында мүәјјән едилмиш мәнәви јүксәлиш фүрсәтләрини гаврамагла һәјата кечирсин. Бир дә вар ки, инсан Рамазан ајына јетишиб вә лоруҹ ваҹибдир» мүлаһизәси әсасында ваҹибатларыны јеринә јетирир вә мисилсиз мәнәви немәтләрә јијә дурмаг фүрсәтиндән әсла бихәбәр олур. Мүбарәк Рамазан ајынын имканларындан бәһрәләнмәк истәјириксә, бунун мүтләг шәрти - Рәҹәб ајындан етибарән мәнәви һазырлығы әлдә етмәкдән кечир.
Ики ај мәшг фүрсәти
Рәҹәб ајыны танымаг үчүн ән бөјүк фүрсәт - бу ајда едилән дуалардыр. Рәҹәб ајынын мүбарәк вә зәнҝин дуаларындан бири дә, бу ајын ҝиришиндә, илк дахил олдуғу ҝеҹәсиндә охунан мүбарәк дуадыр. Әхлаг устадларынын, арифләрин бу дуа илә бағлы нурани бујурушларына, изаһларына диггәт етмәк олдугҹа фајдалы олар. Бизләр мүбарәк Рамазан ајына, Илаһи зијафәтә һазырлашмаг үчүн бу кими дуаларын фөвгәл әһәмијјәти вар. Рәббимиз бу гонаглыға, бу Илаһи зијафәтә һазырлыг үчүн ики ај мәшг фүрсәти вериб. Аллаһ гапысыны һазырлыглы дөјмәк үчүн бизләр бу дуалар васитәсилә топарлана биләрик.
Дуада бујурулур: “Аллаһым, һәгигәтән мән Сәндән истәјирәм, Малик сәнсән вә варлыг аләминдә олмаг тутумуна малик һәр шејә гадирсән”. Бизләр Рәббимизә мүраҹиәт едәрәк бәјан едирик ки, Онун гапысына ҝәлмишик, О да һәр шејин саһиби, маликидир.
Дүнјанын ән бөјүк проблемләриндән бири, шејтанын (лән) ән бөјүк һоггаларындан бири будур ки, инсан Аллаһы Халиг олараг таныјыр, Јарадан олараг билир, амма Онун һәр шејин саһиби, малики олдуғуну унудур. Бу дуа илә инсан санки, Рәббинә Ону Халиг кими танымасы илә јанашы, һәр шејин саһиби олараг танымасыны да играр едир. Нәфәсләримизин дә, ҝөзүмүзүн дә, дилимизин дә, һәр шејин саһиби Рәббимиздир.
Биз нәјә ҝөрә мәһз Рәббимиздән истәјирик? Чүнки һәгиги саһиб, һәгиги малик - Одур. Ондан башга кимдән истәјәк? Аллаһдан башга истәнилмәли үнван јохдур. Аллаһдан башга истәдијимизи верә билән үнван јохдур. Варлыг аләминдә нә варса, саһиби Одур. Варлыглары јарадан, онлара мөвҹудијјәт верән, бүтүн варлыг аләминин һәгиги саһиби Одур.
Рәббимизә мүраҹиәт едәрәк бәјан едирик ки, бизим ки, дүзәлмәк потенсиалымыз вар - бу потенсиалы дахилимиздә Рәббимиз гојуб. Мән ки, төвбәли, пешман, дүзәлмәк истәјән һалда аҹизлијими дәрк едирәм вә Сәндән истәјирәм - Сән бизләрә нәзәр салмаға гадирсән.
Бизләр Рәҹәб ајында Аллаһын бәндәси ола, мүбарәк Рамазан ајына Аллаһын гонағы кими дахил ола биләрик. Аллаһа мүраҹиәтлә билдиририк ки, Рәҹәб ајынын да саһиби Одур вә бу ајда дәјишмәк үчүн имкан јарадан гүдрәтә малик олан Одур. Рәҹәб ајына бу истедады, бу имканы Рәббимиз вериб. Аллаһ имкан верди ки, бәндәләр ҝәлиб Рәҹәб ајынын хилас ҝәмисинә дахил олсун вә дүзәлсин. Она ҝөрә дә бизләр үмидли һалда ҝәлмишик.
Һикмәти үзәриндән нәјә ирадә етсә, о, мөвҹудијјәт тапар
Дуанын ардында бујурулур: “Аллаһым, Сән о Аллаһсан ки, Өз һикмәтинә ујғун һәр нәји ки, әмринлә ирадә едәрсән - о шеј мөвҹудијјәт тапар. Сән шәнинә, һикмәтинә, өз Аллаһлығына ујғун һәр нәји ирадә етсән, о мөвҹудијјәт тапар, һәр нәјә ”ол!" десән, олар".
Фәрди һәјатымызда, аилә һәјатымызда, топлумумузда, үммәтин һалында, дүнјанын бу ҝедишатында билмәлијик ки, Рәббимиз нәјә “ол!” десә, олар. Әҝәр бизим тутумумуз олса, ләјагәтимиз олса, габилијјәтимиз олса вә Рәҹәб ајынын имканларындан доғру истифадә едә билсәк, Рәббимизин “ол!” демәси илә һалларымызда дәјишиклик әмәлә ҝәләр. Биз бунлары биләрәк Аллаһымыздан истәјирик. Демәли, Аллаһын һәгиги саһиблијини, бүтүн варлыг аләминдә баш верә биләҹәк һәр шејә гадирлијини вә Аллаһын һикмәтинә ујғун олараг истәдији һәр шејә мөвҹудијјәт верә билмәсини хатырладырыг.
Пејғәмбәр (с) вә Әһли-Бејтини (ә) васитә гәрар верәрәк истәјәк
Бундан сонра Аллаһдан истәјирик: “Аллаһуммә, инни әтәвәҹҹәһу иләјкә би нәбијјикә Муһәммәдин нәбијјир-раһмәһ салләллаһу әлејһи вә алиһи”.
Аллаһым, мән Сәнә тәрәф үз тутмушам, мән Сәнә тәрәф ҝәлмишәм. Амма, ҝөр, неҹә ҝәлмишәм?! Аллаһым, мән Сәнә үз тутаркән әлибош ҝәлмәмишәм. Мән бунун фәргиндәјәм ки, гәрар вердијин ән али васитәләрлә Сәнә јахынлашым. Онлары шәфаәтчи, һәгиги васитә гәрар верирәм. Аллаһым, мән әзиз Пејғәмбәримизи (с) васитә гәрар верәрәк Сәнә үз тутмушам. Бир Пејғәмбәр (с) ки, рәһмәт Пејғәмбәридир, Аллаһын саламы олсун она вә онун пак Әһли-Бејтинә (ә).
Сонра дуада ҝәлир: “Ја Муһәммәду (с), ја Рәсулаллаһ! Инни әтәвәҹҹәһу бикә иләллаһ Раббикә вә Рабби. Ли јунҹиһә бикә тәлибәти”. Дуанын бу јериндә Пејғәмбәримизә (с) мүраҹиәт едирик. Сонра дејирик ки, биз ону Аллаһ дәрҝаһында васитә гәрар вермишик. Еј Пејғәмбәр (с), Сәни О Аллаһын јанында васитә гәрар вермишик ки, һәм Сәнин Рәббиндир, һәм дә бизим Рәббимиздир. Бу һалда Аллаһын дәрҝаһына үз тутуруг, Аллаһдан истәјирик ки, бизим һаҹәтләримизи, истәкләримизи һәјата кечирсин.
Дуанын ардында ҝәлир: “Аллаһуммә, бинәбијјикә Муһәммәдин вәл-әиммәти мин Әһли-Бејтиһи саллаллаһу әлејһи вә әлејһим. Әнҹиһ тәлибәти” - “Аллаһым, Сәни анд верирәм Һәзрәт Рәсулаллаһа (с) вә онун пак Әһли-Бејтиндән (ә) олан Мәсум Имамлара (ә), һаҹәтләрими һәјата кечир!”.
Аллаһы ән үстүн бәндәләрә, Рәббимиз үчүн ән әзиз оланлара анд веририк вә јенә дә Аллаһымыздан һаҹәтләримизи һәјата кечирмәсини истәјирик.
Демәли, биз бунун фәргиндә олаг ки, Рәҹәб ајынын илк ҝеҹәсинды белә бир әзәмәтли дуа вар вә бундан сонра инсан Аллаһдан нә һаҹәтини истәсә, Аллаһ Тәала иншәаллаһ һәјата кечирдәр.
Аллаһла доғру данышмағы өјрәнирик
Мүбарәк Ислами мәтнләрдә бизләр Аллаһ Тәала илә неҹә данышмағы өјрәнирик. Ҝөрүрүк ки, Аллаһ Тәаланын бүтүн варлыг аләминә, бүтүн мөвҹудлара һәгиги саһиблији, маликлији вурғуланыр. Аллаһ Тәала, бүтүн варлыг аләминин һәгиги саһиби вә маликидир. Рәббимиз бизи јарадыб вә бизи бош-бошуна бурахмајыб. О, бизи јарадыб, Рәббимиздир вә варлыг аләминдә баш верән һәр шејдә, һәр вәзијјәтдә, һәр дурумда бизим варлығымызы тәмин едир.
Биз һәр ан Аллаһ Тәаладан мөвҹудијјәт алырыг. Нәјимиз варса - Аллаһымыздандыр. Ејни заманда вурғуланыр ки, Аллаһ Тәала гадирдир. Һикмәт үзәриндә бизим ләјагәтимиз, тутумумуз, габилијјәтимиз олса, дуада истәдикләримизи дә һәјата кечирдәр. Бизим тутумумуз олса, һалымыз јериндә олса, Аллаһ инајәт едәр.
Аллаһын бизә көмәк вә вәһдәт үчүн һәдијјә етдији ип
Дуанын өнәмли бир һиссәси дә Пејғәмбәрә (с) вә онун пак Әһли-Бејтинә (ә) тәвәссүл үзәриндәдир. Һәзрәт Имам Садиг (ә) бујурур: “Биз Әһли-Бејт (ә) - һәмин Илаһи ипик ки, Аллаһ Тәала бујуруб: ”Һамылыгла Аллаһын ипиндән јапышын вә дағылышмајын".
Һәзрәт Имам Садиг (ә) бәјан едир ки, һәмин Илаһи ип - пак Әһли-Бејтдир (ә). Ким Аллаһын ипиндән - Пејғәмбәр (с) вә Әһли-Бејтинин (ә) әтәјиндән јапышса - гуртулуша чатаҹаг. Ким онларын ниҹат ҝәмисинә ајаг гојса - гуртулмушлардан олаҹаг. Демәли, Рәҹәб ајынын илк ҝеҹәсиндә хилас ҝәмисинә дахил олмаг үчүн бизләрә Әһли-Бејтә (ә) тәвәссүл едәрәк, истәмә өјрәдилир.
Әхлаг устадларындан бири бујурур ки, тәвәссүл будур ки, инсан бир јерә ҝедәҹәк, бир зијафәтә дәвәт олунуб - амма ора ујғун ҝејими јохдур. Инсанын өзүндә олмајанда, өзүндән бөјүјүндән истәјир. Тәвәссүл будур ки, бизим Илаһи зијафәтә дахил олаҹаг тәгва либасымыз јохдур, она ҝөрә Әһли-Бејтә (ә) мүраҹиәт едәрәк, онлардан истәјирик. Бизим тутумумуз, ләјагәтимиз јохдур ки, Аллаһ зијафәтинә дахил олаг, Амма Әһли-Бејтин (ә) Аллаһ јанында олан мәгамыны, абрыны васитә тутараг, бу Илаһи зијафәтә дахил олмаг истәјирик.
Истәмәк, бизи Она даһа да јахынлашдырар
Аллаһ Өзү һәр бәндәсинә бәјан едиб ки, әҝәр Ону чағырсалар, ҹавабландыраҹаг. Ким Аллаһы чағырды ки, ҹавабландырылмады? Бизим мүсибәтимиз одур ки, биз чағырмырыг. Биз Аллаһдан башга һәр јаранмышы, һәр аҹизи хилас мәнбәји ҝөрүрүк. Һалбуки, Аллаһдыр ҹавабландыран...
Пак Әһли-Бејт (ә) дә бу јолда ән ҝөзәл васитәдир. Биз ҝүндәлик һәјатымызда мәгама, пула, танышлыға, јолдашлыға, ҹүрбәҹүр мәсәләләрә о гәдәр ҝүвәнирик ки, јаддан чыхарырыг ки, бунлар һамысы өтәри, гәрарлашылмыш мөвзулардыр. Инсанлар разылашыблар ки, бу ҹүр олсун. Мисал үчүн, инсанлар разылашыблар ки, бир метро карты олаҹаг, онун үчүн өдәниш едәҹәкләр, сонра ону гојуб кечәҹәкләр. Буна разылашма дејилир. Бунун бүнөврәсиндә һеч нә дурмур. Бу ҝүн разылашырлар - бу ҹүр олур, сабаһ бу разылыг позулур - башга ҹүр олур. Бу дүнјада олан бүтүн мәсәләләр бу ҹүрдүр. Мәгам да, имканлар да мүвәггәтидир. Бир јерә бир вирус дахил олур, һәр кәс нәји варса, гојуб ҝедир, гачыр о јердән.
Бу гәдәр дүнја мүвәггәтидир. Һәгиги саһиб - Аллаһдыр. Һәр ан, һәр вәзијјәтдә бизә јијә дуран Одур. Инсан бунун фәргиндә олмалыдыр. Инсан илк өнҹә истәмәји өјрәнмәлидир.
Һәзрәт Әли (ә) бујурур: “Инсанларын ән чох Аллаһ таныјаны - онларын ән чох Аллаһдан истәјәнидир”. Бир дә ҝөрүрсән ки, адам олур, ја ҹаһиллијиндән, ја гәфләтдән, ја дини сәһв баша дүшмәсиндән дејир ки, мән Аллаһдан истәмәјә утанырам. Уҹа Аллаһ Өзү бәјан едир ки, бәндә Ондан истәсин. Биз истәјәк - хырда мәсәлә јохдур, һәјатымызын һәр деталына, һәр мәгамына аид истәјәк ҝәрәк. Бу истәмәнин өзүндә Аллаһла бир бағланты јараныр, Аллаһла рабитә әмәлә ҝәлир. О кәс Аллаһы чох таныјыр ки, ән чох Аллаһдан истәјир.
Һәзрәт Рәсулаллаһ (с) бујурур: “Һәр вахт ки, сизләрдән бири дуа едәр, һамы үчүн дуа етсин. Чүнки, бу, гәбул олмаға даһа да јахынлашмаг тофигаты верәр”.
Бир вар ки, инсан өзү үчүн дуа едәр, буна да Аллаһ нәзәр салар. Амма елә ки, инсан ҹәм үчүн дуа едир - ҹәм үчүн едилән гәбул олмаға даһа да јахынлашдырыр.
Аллаһым, бизләрә Рәҹәб ајыны таныјыб бу ајын имканларындан бәһрәләнмәк ләјагәтини нәсиб ет!
Аллаһым, бизләри бу ајда бағышланмышлардан, төвбәкарлардан гәрар вер!
Аллаһым, Сәндән истәмәји бизләрә нәсиб ет! Амин!
