Азәрбајҹанда һәјат давам едир. Дүнјанын һәр јериндә олдуғу кими, ҝүнәш өзүнү ҝөстәрир, ај ахшамлар бојланыр, фәсилләр бир-бирини әвәз едир, һава гәбул етмәк мүмкүндүр, дүканда чөрәк сатылыр вә с. 25 илдир Азәрбајҹан инсанына инандырмаг истәјибләр ки, бунлара шүкр етмәк, бунларла кифајәтләнмәк лазымды. Өлкә вәтәндашынын бејнинә јеридибләр ки, јерин дәринлијиндән чыхан нефт дә, дүканда 3 нөв чөрәјин сатылмасы да, һаванын хош кечмәси дә узагҝөрән сијасәтин нәтиҹәсидир. Һәтта фантазија о һәддә чатыб ки, Ермәнистан халгынын ајагланмасыны да Азәрбајҹан һакимијјәтинин гәләбәси, дипломатик уғуру кими тәгдим етмәкдән чәкинмирләр.
Ән писи дә будур ки, һөкумәт халгын бејнинин “формат” олундуғуна әмин олуб вә буна ҝөрә асанлыгла “гатыг гарадыр” тәблиғаты апара билир.
Амма мараглы олан башга мәгам да вар. Бу өлкәнин адамлары һараса тәләсир. Кимиси автобуса чатмаға, кимиси ҝөрүшә, кимиси ишә, кимиси дә чајханада домино ојнамаға тәләсир. Амма бу өлкәнин адамлары һәр ҝүн лазым олан јерә ҝеҹикирләр. Әтрафымызда һәрәкәт едән адамларын әсас јерә тәләсмәмәси инсаны дәһшәтә ҝәтирир. Биз халг олараг азадлыға, шәффафлыға, демократијаја, мүсбәт дәјишикликләрә тәләсмәлијик. Әкс һалда, вахтында минә билдијимиз автобус да, вахтында чатдығымыз иш јеримиз дә һеч нәји дәјишмәјәҹәк. Биз һараса вахтында чатдығымыза ҝөрә севинә биләрик. Амма ҝеҹикдијимиз бир јер вар ки, бу ҝеҹикмә талејимиз баһасына баша ҝәлир.
Бәли, биз 25 илдир лазым олмајан һәр јерә тәләсирик. Бир сериала диггәтлә бахмағы бу өлкәјә диггәтлә бахмагдан үстүн тутмушуг. Гаранлыг кечмишә тәләсдијимизә ҝөрә ишыглы сабаһа ҝеҹикмишик. Бизә инандырыблар ки, халгын мәнфәәти мәдәси бојда олмалыдыр.
Инди јалныз бир чыхыш јолу вар. Һамылыгла буҝүнә гәдәр ҝеҹикдијимиз јерә тәләсмәлијик. Тәләсмәлијик ки, бизи узун илләр ҝеҹикдирәнләр бу дәфә ҝеҹикдикләрини гәбул етсинләр.
