11 апрел нијә тарихә дүшәҹәк?
20 ҝүндән сонра өлкәдә президент сечкиси кечириләҹәк. Амма бу өлкәнин ҝүндәми тамам фәргли һадисәләрлә јүкләниб. Санки, президент сечкиләри Азәрбајҹанда дејил, Африканын һансыса өлкәсиндә кечириләҹәк. Иранда, Суријада, Түркијәдә, Русијада баш верәнләр Азәрбајҹан инсаныны даһа чох өзүнә чәкир. Әлбәттә бу өлкәдә 25 илдир ки, сечки кечирилмир вә һамы да буну белә гәбул едиб. Амма 11 апрел сечкиси әввәлки сечкиләрдән фәргләнир вә бу фәргә ҝөрә тарихә дүшәҹәк.
Бәли, 11 апрел сечкиси сечиб-сечилмәк әнәнәсинин “сојгырым”ы ҝүнү олаҹаг. 11 апрели сечкијә охшатмаг үчүн әнәнәви намизәдә 7 намизәд гошублар. Амма бу “намизәд”ләрин теледебатлары, мүсаһибәләри, мөвгеләри имитасијаны да дармадағын едир. Ајдын ҝөрүнүр ки, 11 апрел сечкиси намизәдсиз галыб. Амма ән дәһшәтлиси бу да дејил. Фаҹиә будур ки, намизәдләрин һеч бири ҹәмијјәтин севҝиси илә әһатә олунмајыб.
Сиз нә вахтса бир груп адамын Араз Әлизадәјә тәрәф гачыб “биз сизинлә фәхр едирик” дедијини ҝөрмүсүз?
Нә вахтса бир нечә садә вәтәндашын “Заһид Оруҹ бу өлкәнин хиласкары ола биләр” дедијинә шаһидлик етмисиз?
Јахуд, бир нәфәр нормал адамын “Һафиз Һаҹыјевә сәс верәҹәм” дедијини ешитмисиз?
Диҝәр 5 намизәдин вәзијјәти дә охшарды. Јәни, шәффаф сечки кечирилсә белә бу адамлар 2-3 фаиз сәс ала билмәзләр. Демәли, бу өлкәнин ән нүфузсуз, гејри-ҹидди гәбул олунан адамларыны бу халга рәһбәр олмаға лајиг билибләр. Мәһз о адамлары гејдә алыблар ки, һәмин адамларын ады чәкиләндә инсанларда мәнфи реаксијалар мүшаһидә олунур. Фактики олараг намизәдләр арасында халгын адамы јохдур. 9 милјонун талеји үзәриндә ојун гурублар вә јаланчы намизәд кими 7 нәфәр ән севимсиз “сијаси хадим”и өнә верибләр. Сечки гутусунун әбәди “фоварит”и олан 1 нәфәр исә бу мәнзәрәјә тамаша едир.
Бу дәфә һәм сечки сахталашдырылыр, һәм дә ән гејри-ҹидди адамлары намизәд кими гејдә алмагла халг тәһгир олунур.
Бир сөзлә, биз намизәдсиз сечки кечирмәклә нөвбәти дәфә тарихә дүшүрүк. Халг сечки гутусуна һарам гатыланда сусарса, Һафизләри, Аразлары, Заһидләри она намизәд кими тәгдим етмәкдән чәкинмәзләр.
