Шрифт өлчүсү:
А+
А
А-
26 Јанвар 2018

ҺАҸЫЛАРА БИР ТӨВСИЈӘ

Бисмилләһир-Раһмәнир-Раһим

Бизи доғру јола һидајәт едән, гәлбимизи Гуран вә Әһли-Бејтлә (әләјһимуссалам) нураниләшдирән Јеҝанә Аллаһа шүкүрләр олсун.

Динимиздә олан һәҹҹин ваҹиб әмәлләриндән бири дә "ниса тәвафы"дыр. "Ниса тәвафы" - һәҹҹдә олан сон тәвафдыр вә буну тәрк етмәк һаҹы үчүн һарамдыр.

"Изаһлы шәриәт мәсәләләри" китабынын "Издиваҹы һарам олан гадынлар" бөлмәсиндә белә бир фәтваја раст ҝәлирик:

Әҝәр (евли) киши һәҹҹ әмәлләриндән бири олан "ниса тәвафы"ны јеринә јетирмәсә, бу тәвафы јеринә јетирмәјәнә гәдәр ҹинси ләззәтләр она һалал олмаз. Һәмчинин (әрли) гадын "ниса тәвафы"ны јеринә јетирмәсә, бу тәвафы јеринә јетирмәјәнә гәдәр һәјат јолдашы она һалал олмаз. (Мәсәлә 2409), фарс дилиндә.

Башга сөзлә десәк, әҝәр киши (гадын) истәр гәсдән, истәр унутганлыг, истәрсә дә ҹаһиллик (мәсәләни билмәмәзлик) үзүндән һәҹҹдә оларкән "ниса тәвафы"ны јеринә јетирмәсә, јахуд сәһв јеринә јетирсә, һәҹҹи батил дејил вә өһдәсинә һеч бир кәффарә дүшмүр, лакин ваҹиб бир әмәли јеринә јетирмәмиш олур. О, Вәтәнинә гајыданда өз һәјат јолдашы илә јахынлыг едә билмәз. Јәни онларын ҹинси әлагәдә олмасы, бир-биринин ачыг-сачыг јерләринә шәһвәт һиссилә бахмасы вә диҝәр ләззәтләрдән истифадә етмәси һарамдыр.

"Һарам"да мәгсәд, талағын позулмасы дејилдир. Әр-арвад бир-биринә мәһрәмдир, лакин ҹинси ләззәт алмаглары ҝүнаһ сајылыр.

Бу һөкм субај һаҹылара да аиддир. Белә ки, о, (истәр ханым, истәрсә дә оғлан) һәҹҹдә "ниса тәвафы"ны јеринә јетирмәсә, аилә һәјаты гура билмәз.

Тәәссүфлә гејд етмәк лазымдыр ки, бәзән елә һаҹыларла растлашырыг ки, мәсәләни билмәмәзлик уҹбатындан һәҹҹдән гајытдыгдан сонра бу ҝүнаһа мүртәкиб олурлар.

Бәс мәсәләнин һәлли нәдәдир?

Биринҹи нөвбәдә бу фәтвадан хәбәри олмајан һаҹы мәсәләни билдикдән сонра һәмин ан һәјат јолдашындан узаглашмалы (јәни ҹинси ләззәтләрдән ајрылмалы) вә сәбр етмәлидир. Белә ки, әр-арвад арасында һарамлығы арадан галдырмаг үчүн һәҹҹдән гајыдан шәхс јенидән Мәккәјә гајытмалы вә "ниса тәвафы"ны јеринә јетирмәлидир. Әҝәр гајытмаға имканы олмаса, өз јеринә бирини наиб тутмалыдыр ки, һәмин наиб онун әвәзинә бу әмәли јеринә јетирсин. Буну һәҹҹә ҝедән һаҹылардан да хаһиш етмәк олар.

Бу әмәл нә гәдәр тез јеринә јетирилсә, бир о гәдәр аилә үчүн хејирдир. Чүнки ортада олан һарамлыг вә евдә чәкилән әзаб-әзијјәт тез арадан галдырылар.

Әҝәр "ниса тәвафы"ны јеринә јетирмәјән һаҹы өз һәјат јолдашы илә јахынлыг едәрсә, ҝүнаһ етмишдир. Әҝәр дүнјаја ушаг ҝәләрсә, һәмин ушаг һалалзадә сајылар вә ирс апарар.

"Ниса тәвафы"ны јеринә јетирмәјән субај һаҹы (ханым вә ја оғлан) һәҹҹдән гајытдыгдан сонра евләнә билмәз. Әҝәр евләнәрсә, онда ја Мәккәјә гајыдыб "ниса тәвафы"ны јеринә јетирмәли, ја да өз әвәзинә наиб тутмалыдыр ки, һәмин шәхс онун әвәзиндән "ниса тәвафы"ны јеринә јетирсин. Сонра исә ваҹиб еһтијата әсасән јенидән кәбин охунулсун.

"Ниса тәвафы" һаггында үмдә олан мәсәләләри гејд етдик. Үмидварыг, һәҹҹә ҝетмәк истәјәнләр һәҹҹ мәсәләләринә аид олан әмәлләри диггәтлә нәзәрдән кечирәҹәк вә сәһләнкарлыға јол вермәјәҹәкләр.

Илаһи! Әһли-Бејт хатиринә, ҝүндәлик вәзифәләримизи дүзҝүн јеринә јетирмәкдә бизә јардым ет! Амин, ја Раббәл аләмин.


4130 дәфә бахылыб
در حال ارسال اطلاعات...