Дүз 4 ил бундан өнҹә - јанвар ајынын 7-си ахшам саатларында Азәрбајҹан Ислам Партијасынын сәдри Мөвсүм Сәмәдов һәбс олунду. Партијанын гәрарҝаһындан евә ҝедәркән һәбс олунан Мөвсүм Сәмәдовла бирҝә, Партијанын тәшкилати мәсәләләр үзрә сәдр мүавини Вагиф Абдуллајев дә сахланылды.
Әввәлҹә мәһкәмә онлара 10 сутка һәбс ҹәзасы верди. Бундан сонра апарылан әмәлијјатларла даһа бир нечә нәфәр һәбс едилди.
9 ај сонра - 7 октјабр 2011-ҹи илдә узун мәһкәмә чәкишмәсиндән сонра Азәрбајҹан Ислам Партијасынын (АИП) сәдри Мөвсүм Сәмәдов, онун гајыны Фирдовси Мәммәдрзајев, әмиси оғлу Дәјанәт Сәмәдов, партијанын сәдр мүавини Вагиф Абдуллајев вә Астара рајон тәшкилатынын сәдри Руфулла Ахундзадә, руһаниләр Сејјид Фәрамиз Аббасов вә Зүлфүгар Микајылзадәјә һөкм охунду. Һаким Елдар Исмајылов Азәрбајҹан Ислам Партијасынын (АИП) сәдри Мөвсүм Сәмәдова 12 ил, Фирдовси Мәммәдрзајевә 10 ил, әмиси оғлу Дәјанәт Сәмәдова 10 ил, партијанын сәдр мүавини Вагиф Абдуллајевә 11 ил, Астара рајон тәшкилатынын сәдри Руфулла Ахундзадәјә 11 ил 6 ај, Фәрамиз Аббасова 11 ил азадлыгдан мәһруметмә ҹәзасы верди. Зүлфүгар Микајылзадәјә исә 5 ил сынаг мүддәти олмагла 5 ил шәрти һөкм охунду.
Исламчылары мүдафиә едәнләр һесаб едир ки, бу һәбсләр сијаси характерлидир вә әсасән јанварын 2-дә партијанын Баш Мәҹлисиндә Мөвсүм Сәмәдовун чыхышы илә бағлыдыр. 2007-ҹи илдә партија сәдри сечилән Мөвсүм Сәмәдов 2011-ҹи ил јанварын 2-дә Азәрбајҹан Ислам Партијасы Баш Мәҹлисинин иҹласында чыхыш едәрәк мәктәбләрдә һиҹаба гадаға гојулмасыны кәскин писләјиб вә һакимијјәтин үнванына сәрт иттиһамлар сәсләндириб.
Вагиф Абдуллајев һәбсдән 1 ил сонра ҹәзачәкмә мүәссисәсиндә дүнјасыны дәјишсә дә, диҝәриләри һәлә дә һәбсханададыр./фактхебер/
