Шрифт өлчүсү:
А+
А
А-
29 Август 2023

Әждаһа Таһир вә халгын ҝөзү

Бир вахтлар әлиндә әждаһа ојунҹагла чыхыб ону севмәјәнләри һәдәләјән вә сосиал шәбәкәләрдә мәшһурлашан депутат Таһир Кәримли гәрибә ачыглама вериб. О дејиб ки, Азәрбајҹанда отуз јашындан јухары евләнмәјән инсанлар верҝијә ҹәлб олунсун.

Әслиндә јазыг әждаһа (әждаһадан јазыг олар? Олар, олар, биз аналогу олмајан өлкәјик, биз дә һәр шеј олур) Таһир мүәллим белә бир сөз демәјиб. Мүсават гәзетинә мүсаһибәсиндә дә буну ачыгҹа билдирәрәк белә дејир: "Сосиал медиада мәлумат јајылыб ки, ҝуја 30 јашдан јухары евләнмәјән шәхсләрин верҝијә ҹәлб олунмасыны тәклиф етмишәм. Әввәлләр Түркијәдә белә тәклиф олмушду, Азәрбајҹанда да әввәлләр “субајлыг верҝиси” варды. Мән исә белә тәклиф вермәмишәм, һәтта бунун мүмкүн олмадығыны билдирмишәм. Мәни халгын ҝөзүндән салмаг истәјирләр, хаһиш едирәм, инанмајын."

Ҝөрдүјүнүз кими јазыг әждаһа мүәјјән белә бир сөз демәјиб. Бәс нијә ҹамаат белә дүшүнүр? Нијә сосиал медиа белә дүшүнүр? Ҹаваб чох садәдир. Бизим инсанлар Таһир мүәллим кими сөз әждаһаларынын әлиндән боғаза јығылыб. Бу депутатлар о гәдәр лазымсыз, дәјәрсиз, фәрсиз, халг үчүн иш ҝөрмәјән мәхлуглара чеврилиб ки, артыг халг һарда пис бир шеј ҝөрүр, дејир јәгин һансыса депутатын чәрәнләмәсидир. Һәтта јазыг вәтәндаш јатыб јухуда ҝөрсә ки, доғрудан да белә бир һадисә баш вериб, депутатлар белә иш ҝөрүбләр, о адам јухудан ојаныб дүшәҹәк сосиал шәбәкәләрин ҹанына. О сајт сәнин, бу сајт мәним, ҝөрәк доғрудан да белә бир һадисә баш вериб јохса јох?

Јахшы билдик ки, өлкәдә әндирабади гәрарлар оланда илк ағла ҝәлән депутатлар олур, бәс јахшы нијә ҝөрә 125 депутат ичиндән мәһз бу хәбәр Таһир Кәримлинин барәсиндә јајылыб? Бу барәдә әлимиздә мәлумат јохдур. Каш ки, әждаһа мүәллим өзү бу һагда да бир ики кәлмә данышарды. Амма ола биләр ки, бу тәклиф әждаһа тәклиф кими сосиал шәбәкә истифадәчиләринин диггәтини чәкиб. Әждаһа дејирләркән дә ким ағла ҝәлмәлидир ки? Бир Надир, бир Таһир. Хәбәр дә шоу бизнесә аид олмадығы үчүн Надир Гафарзадә еһтималы чох зәифдир. Сыфыра бәрабәр. Одур ки, ҝеријә әждаһа Таһир галыр.

Сонда ону да дејәк ки, әждаһа мүәллим мүсаһибәсинин сонунда дејир ки, мәни халгын ҝөзүндән салмаға чалышырлар. Әҝәр доғрудан да әждаһа мүәллим халгын ҝөзүндә һәлә дә өзүнү дәјәрли, һөрмәтли инсан сајырса онда јашамаға дәјәр.


1484 بازدید
در حال ارسال اطلاعات...