Мәҝәр ариф вә Аллаһшүнас Әһли-бејт (ә) тәлимләри олмадан һансыса мәрифәтә вә бу мәрифәт нәтиҹәсиндә илаһи ешгә наил олмаг мүмкүндүрмү?!
Гурани-мәҹиддә бәзән елә сөзләр ишләдилир ки, бу сөзләри там мәнада дәрк етмәк мүмкүн олмур. Шүбһәсиз ки, бу сөзләрин һәгиги мәнасыны ҝерчәк Гуран мүәллимләри олан Пејғәмбәр (с) вә Әһли-бејтдән (ә) өјрәнмәлијик. Әһли-бејтдән (ә) ујғун сөзләри там мәнада ачыглајан рәвајәтләр нәгл олунмушдур.
Гуранда тез-тез ишләдилән әсрарәнҝиз сөзләрдән бири “сират” сөзүдүр. Биз сират дедикдә јалныз јол мәнасыны баша дүшүрүк. Бәс бу јол нә јолдур, һарадан һараја апарыр, онун һансы сәҹијјәләри вар? Бу јолда неҹә һәрәкәт етмәк лазымдыр? Сират сөзү тәкликдә бу суаллара ҹаваб вермир. Бу сајаг мәналары ајдынлашдырмаг үчүн Пејғәмбәр (с) вә Әһли-бејт (ә) Аллаһ тәрәфиндән вәзифәлидир. Онларын сонуз елминдән фајдаланмадан Гурана мүраҹиәт етмәк инсаны чашдырыр. Ајәдә бујурулур: “Савадсыз инсанлар арасында онлара ајәләрини охусун дејә өзләриндән пејғәмбәр сечән, онлары пака чыхаран, онлара китаб вә һикмәт өјрәдән кәс Одур (Аллаһдыр). Һеч шүбһәсиз, онлар бундан өнҹә ашкар азғынлыг ичиндә идиләр...” (“Ҹумуә”, 2) Башга бир ајәдә бујурулур: “Әҝәр билмирсинизсә, елм вә билик әһлиндән сорушун.” (“Нәһл”, 43)
“Кафи”, “Тәфсири-Гумми”, “Тәфсири-Әјјаши” китабларында гејд олунмуш бир сыра рәвајәтләрдә билдирилир ки, «зикр әһли» дедикдә Пејғәмбәр (с) вә Әһли-бејт (ә) нәзәрдә тутулур. (“Кафи”, 1-211.) Бәли, Аллаһ-тәала Гураны пејғәмбәр евинә назил етди. Гуранын мәна вә мәфһумлары бу ев әһлинин гәлбиндә тәҹәлла етди. Халг бу инсанлар васитәси илә Гуран тәбирләринин һәгиги мәнасыны анламалыдыр. Имам Садиг (ә) “Иһдинәс-сиратәл-мустәгим” ҹүмләси һаггында бујурур: “Дејилир ки, бизи доғру јола јөнәлт, јәни јолунда сахламагла тәрбијәләндир. Елә бир јол ки, бизи ешгинә доғру чәкир, беһиштинә чатдырыр. Бу јол өлчүсүз истәкләримизә мане олур, нәтиҹәдә учурума јуварланмырыг...” (“Үјуни әхбарур-риза” , 1-305)
Мәҝәр ариф вә Аллаһшүнас Әһли-бејт (ә) тәлимләри олмадан һансыса мәрифәтә вә бу мәрифәт нәтиҹәсиндә илаһи ешгә наил олмаг мүмкүндүрмү?! Онларын ҝөстәришләри олмадан, бу ҝөстәришләрә әмәл етмәдән, онларын шәфаәтиндән мәһрум вәзијјәтдә беһиштә јол тапмаг мүмкүнмү?! Онларын вилајәт сипәринә дахил олмадан азғын нәфсин тәһлүкәләриндән гуртармаг олармы?! Бу һидајәт имамларына игтида етмәдән гаршысы алынмаз зәрбәләрдән неҹә јајынмаг олар?! Әҝәр бир шәхс десә ки, Әһли-бејтә (ә) үз тутмадан јалныз Гуран сајәсиндә бүтүн бу тәһлүкәләрдән аманда галмаг мүмкүндүр, һәмин шәхс Гуранын зиддинә данышмыш олур. Тәкҹә Аллаһын китабына сарылмаг Аллаһ вә пејғәмбәрин разылығы олмајан бир ишдир. Белә бир сечим инсаны јалныз азғынлыға апарыр. Беләҹә, там әминликлә дејә биләрик ки, сирати-мустәгим мәна бахымындан Гуран, нүмунә бахымындан Әһли-бејтдир (ә). Бу ики зәрурәт бир-бирини тамамлајыр вә онлар арасында ајрылыг мүмкүнсүздүр. Әһли-бејтдән (ә) үз чевириб билаваситә Гуран мәфһумларыны анламаг, онун ләтиф ишарәләрини дәрк етмәк әл чатмаз ишдир. Әслиндә сирати-мустәгим Гуран мәналарына јол тапмаг, камил фигһә јијәләнмәк, тәһлүкәләрдән гуртулмаг, дүнја вә ахирәт сәадәтинә говушмаг, әзабдан аманда галыб беһиштә дахил олмаг үчүндүр. Белә бир јол исә Әһли-бејтдир (ә)!
