Имам Багир (ә) бујурур: “Аллаһын, Онун Өзүнә доғру ајдын вә дүз јолу, јолчуну Аллаһа чатдыран јол биз пејғәмбәр Әһли-бејтијик.” (“Вәсаилул-дәраҹат”, 62, баб 3, һәдис 1; “Биһарул-әнвар”, 26-248, баб 5, һәдис 19)
Бәли, Әһли-бејт (ә) Аллаһын сирати-мустәгимидир. Чүнки Аллаһы камил вә әһатәли таныјан онлардыр. Онлар Аллаһын истәкләриндән даһа јетәрли хәбәрдардырлар. Инсан Гуранын әсрарәнҝиз ајәләри илә јанашы Әһли-бејт (ә) тәрәфиндән танытдырылмыш Аллаһы гәбул етмәлидир.
Онларын варлығы илә һаггын бүтүн истәк вә ҝөстәришләри анлашылыр. Онларын мәнәви гүдрәти вә ҝөстәришләри илә инсан Аллаһа, Аллаһын разылығына, Аллаһла јахынлыға чатыр. Истәнилән башга јолла һәрәкәт едән кәс мәгсәдә чатмајаҹаг, јолуну азаҹаг.
Çох мүһүм бир рәвајәтдә дејилир: Имам Садигдән (ә) сирати-мустәгимин мәнасы һаггында сорушулду. Имам (ә) бујурду: “Сирати-мустәгим Аллаһы танымаға апаран јол мәнасыны билдирир.” Ахы бу ҝениш варлыг аләминдә Аллаһы танымаг үчүн Әһли-бејтдән (ә) башга һансы јол вар? Аллаһа ариф Әһли-бејти (ә) бошласаг, Аллаһы танымаг үчүн һансы јола үз тутасыјыг?! Өз илаһи маарифләри әсасында Аллаһы, Гијамәти, фигһи, әхлагы, һәгигәтләри инсанлара чатдыран Әһли-бејтдир (ә). Һәгигәтләрә јол тапмаг үчүн Әһли-бејтә (ә) үз тутмаг инсанларын ишидир. Һәгиги дин онлардан өјрәнилир. Бир сөзлә, Әһли-бејт (ә) васитәси илә әзәмәтли мәрифәт сәһнәсинә дахил олмаг мүмкүндүр. Әһли-бејтсиз (ә) һәјат зүлмәт, ҹәһаләтдә чабаламагдыр.
Имам Садиг (ә) сирати-мустәгимлә бағлы рәвајәтчијә изаһатында бујурур: “Һаггында данышылан сират икидир: дүнјадакы сират вә ахирәтдәки сират. Дүнјадакы сират имамдыр вә она итаәт ваҹибдир. Дүнја сиратыны таныјыб она игтида едән ахирәтдәки сиратдан да кечәҹәк. Дүнјада бу сираты танымајыб өзбашына галан ахирәт сиратында бүдрәјиб ҹәһәннәм одуна дүшәҹәк. (“Мәанијул-әхбар”, 32)
Бәли, инсанын дүнја вә ахирәтини тәмин едәҹәк ҝерчәк мәрифәт вә танышлыг үчүн ајә вә рәвајәтләрә әсасән мәсум имамлара, јәни Әһли-бејтә (ә) үз тутмаг лазымдыр.
