Бүтүн инсанлар өз әгидәләринә ујғун олараг, Аллаһ гаршысында бәндәчиликләрини изһар едирләр
Пејғәмбәрләр вә хүсусилә дә мүгәддәс Ислам дини иҹтимајөнлү нәзәријјәни тәсдиг едиб гүввәтләндирир. Бу дин инсаны елә тәрбијә етмәк истәјир ки, онун тәсири алтында инсан өз һәјатынын бүтүн мәрһәләләриндә бүтүн бәшәријјәтә, вә еләҹә дә Ислам ҹәмијјәтинә гаршы мәсулијјәт дәрк етсин. Мисал үчүн, билирик ки, намаз фәрди бир ибадәтдир. Бүтүн инсанлар өз әгидәләринә ујғун олараг, Аллаһ гаршысында бәндәчиликләрини изһар едирләр. Амма биз мүсәлманлар Аллаһ гаршысында өз бәндәчилијимизи намаз шәклиндә изһар едирик. Намаз гыланда һәмд сурәсини охујан шәхс ибадәт мәгамында бәндәчилијини билдирәркән Аллаһа хитаб олараг демир: “Мән сәнә ибадәт едирәм.” Дејир: “Биз сәнә ибадәт едирик”. Әҝәр бир нәфәр ҝеҹә дә олса, тәк ибадәтә дајаныб намаз гылмаг истәсә, демәлидир: “Биз сәнә ибадәт едирик.” Бир нәфәр мүсәлман, инсан олмајан сәһрада да тәк намаз гылса, демәлидир: «Ијјакә нәбуду вә ијјакә нәстәин» Намазда һеч вахт демәк олмаз: «Ијјакә әбуду вә ијјакә әстәин» (Јәни, мән сәнә ибадәт едирәм вә мән сәндән јардым диләјирәм.) Һөкмән, «биз сәнә ибадәт едир вә биз сәндән көмәк истәјирик» - демәлидир. Бу о демәкдир ки, мөминләр бир-бирләрини һәмишә өз әтрафында билмәлидирләр. Инсан намаз гылдыгда давамлы олараг, мөминләри өз кәнарында ҝөрүр. Һәмчинин намаздан хариҹ оланда да бүтүн мөминләрә салам вермәлидир. Бу Ислам тәрбијәсидир. Бүтүн Ислам ҝөстәришләриндә - истәр фәрди вә иҹтимаи ибадәтләрдә, истәрсә дә игтисади вә иҹтимаи-тәрбијәви мәсәләләрдә, һәтта ҹиһад вә мүдафиә мәсәләләриндә мүсәлман өзүнү диҝәр мөминләрә шәрик вә бағлы билмәлидир. Бу Ислам дининә мәхсус олан бир тәрбијәдир.
