Аллаһым! Сәни шаһид тутурам вә Сәнин шаһидлијин кифајәтдир ки, мән өз тәблиғ вә рисаләт вәзифәмә әмәл етдим.
Гәдир-Хум хүтбәсиндә Имам Әлинин (ә) таныдылмасы
Һәзрәт Пејғәмбәрин (с) вида һәҹҹиндән гајыдан заман Гәдир-Хум чөлүндә һүҹҹәтини тамамлајыб, Имам Әлини (ә) өзүндән сонра рәһбәр вә вәли елан етмәси – тарихин унудулмаз мүһүм һадисәләриндән биридир. Һәзрәт (с) бу сәһрада унудулмаз бир хүтбә сөјләмишдир ки, һәмин хүтбәдә вилајәтин сирләрини ачмыш вә инсанлара һәгиги Илаһи рәһбәрин хүсусијјәтләрини бәјан етмишдир. Имам Әлини (ә) мүсәлманлара танытмыш вә әлиндән тутуб, ону өзүндән сонра рәһбәр елан етмишдир.
Бу мәшһур хүтбәдә Һәзрәт Пејғәмбәр (с) Имам Әлини (ә) неҹә таныдыр? Һәзрәт Пејғәмбәр (с) Имам Әлинин (ә) әлини тутуб јухары галдыран һалда бујурур: “Еј инсанлар! Бу Әли (ә) мәним гардашым, вәсим, елм хәзинәси, хәлифә вә мәним үммәтә ҹанишинимдир. Әли (ә) – Гураны тәфсир едәндир. Одур инсанлары һагга дәвәт едән вә одур Аллаһын разылығына сәбәб олан һәр шеји јеринә јетирән. Одур Пејғәмбәрин (с) хәлифә вә ҹанишини. Одур Әмирәл-мөминин, Аллаһ хәлгинин рәһбәр вә һидајәт едәни. Одур Аллаһын әмри илә накәсинләрин, гаситинләрин, маригинләрин гатили.
(Еј инсанлар) О шеји ки, Аллаһын әмри илә дејирәм вә бу, Аллаһын истәдијидир ки, Онун һеч бир сөзү мәним тәрәфимдән дәјишдирилмәсин. Инди дејирәм: “Аллаһым! Һәр ким Әлини (ә) севир, (ону) сев. Һәр ким онунла дүшмәндир, (онунла) дүшмән ол. Аллаһым! Һәр ким Әлини (ә) инкар едәр, (она) ләнәт ет вә һәр ким онун һаггыны гәбул етмәз, (ону) Өз гәзәбинә ҝирифтар ет!”.
Еј инсанлар! Әлини (ә) һамыдан үстүн билин ки, мәндән сонра һәр бир гадын вә кишидән даһа үстүн вә даһа јүксәкдир. (Билин ки) Аллаһ бизә хатир аләмдә оланлара рузи верәр вә варлыг аләми бәргәрар олар. Һәр ким мәним бу сөзүмү инкар едәр – мәлундур, мәлундур вә Аллаһ дәрҝаһында гәзәбә ҝәләндир.
Аллаһым! Әҝәр инди Әлини (ә), Сәнин вәлини өз ҹанишимин тәјин етдимсә, Сәнин инсанлар үзәриндә олан немәтинин тамамланмаг вә динин камала чатмасына сәбәб олан әмри бәјан етдимсә һамысы-һамысы Сәнин әмринлә олмушдур.
Аллаһым! Сәни шаһид тутурам вә Сәнин шаһидлијин кифајәтдир ки, мән өз тәблиғ вә рисаләт вәзифәмә әмәл етдим.
Еј инсанлар! Аллаһ Тәала сизин дининизин камалыны имамәтдә вә Әли (ә) вилајәтиндә гәрар вермишдир. Она ҝөрә дә һәр ким она вә онун белиндән, мәним ҹанишин өвладларыма дүнјанын ахырынҹы ҝүнүнә гәдәр итаәт етмәзсә, әмәлләринин мәһв олмасына дүчар олар вә ҹәһәннәм атәшиндә ҹавидан һалда әзаб ҝөрәр. Нә әзабы јүнҝүлләшәр вә нә дә она ниҹат үчүн мөһләт вә фүрсәт вериләр.
Еј инсанлар! Бу, Әлидир (ә) ки, мәнә һамыдан даһа чох јардым етмишдир вә мәнә һамыдан даһа лајиглидир. Инсанларын һамысындан мәнә даһа јахындыр вә мәним јанымда һәр кәсдән даһа севимли вә даһа әзиздир.
Аллаһ Тәала вә мән ондан разыјыг. Һарада ки, Аллаһ мөминләрә хитаб етмишдир, илк нөвбәдә она нәзәр салмышдыр. Мәдһ олунан ајә јохдур, мәҝәр онун һаггында. “Инсан” сурәсиндә јада салынан беһишт онун үчүндүр.
Еј инсанлар! Әли (ә) Аллаһ дининин насири вә Аллаһ пејғәмбәринин (с) һимајәчисидир. Одур тәгвалы диндар, тәјјиб, таһир, јол ҝөстәрән вә јол тапмыш.
Пејғәмбәриниз (с) ән јахшы пејғәмбәр, онун вәсиси ән јахшы вәси, оғуллары ән јахшы вәсиләрдирләр.
Еј инсанлар! Һәр бир пејғәмбәрин (ә) нәсли онун белиндәндир, анҹаг мәним нәслим Әлинин (ә) белиндәндир”.
