Ҝүнаһларла танышлығы олан һәр бир мүсәлман чох еһтијатлы олмалыдыр ки, һәјатда баҹардығы гәдәр һеч бир ҝүнаһа булашмасын. Чүнки бәзи һалларда мүһүм ишләрә диггәт јетирән заман кичик ҝүнаһлар јаддан чыхыр. Бу барәдә ики әһвалата диггәт јетирәк:
«Үһүд» мүһарибәси һиҹрәтин үчүнҹү илиндә Үһүд дағы әтрафында баш верди. Бу мүһарибәдә сәһабәләрдән биринин оғлу шәһид олду.
Бу шәһидин анасы оғлунун ганлы ҹәсәдинин үстүнә ҝәлир, онун үзүндән тоз-торпағы тәмизләјиб дејир: «Оғлум, ҝедәҹәјин беһишт сәнә ширин олсун!» Пејғәмбәр (с) бу сөзү ешидәндә о гадына хитаб едиб дејир:
«Беһиштин она ширин олмағыны һарадан билирсән? Ола билсин, һәјатда фајдасыз сөзләр данышыб вә јахуд малы чох олан заман пахыллыг едиб».
Сәд ибн Мәаз «Үһүд» мүһарибәсиндә јараланды. Бир нечә ај хәстә јатдыгдан сонра вәфат етди. Пејғәмбәр (с) вә башга мүсәлманлар ону чох бөјүк еһтирамла дәфн етдиләр. Пејғәмбәр (с) онун һаггында белә бујурур: «Аллаһа анд олсун, онун дәфн мәрасиминдә 70 мин мәләк иштирак етди». Дәфн мәрасиминдән сонра Сәдин анасы гәбрин кәнарында дуруб деди:
«Беһишт сәнә ширин олсун!» Пејғәмбәр (с) бу сөзү ешидәндә үзүнү Сәдин анасына тутуб деди:
«Сакит ол! Аллаһдан нә ҝөзләјирсән?! Инди Сәд гәбирдә әзаб ичиндәдир».
Орада оланлар Пејғәмбәрдән (с) сорушдулар:
«Нә үчүн Сәд гәбирдә әзаб чәкир, һалбуки сизин она бөјүк еһтирамыныз вар иди?»
Пејғәмбәр (с) бујурду:
«Дүздүр, о гәбирдә әзаб чәкир, чүнки о өз аиләси илә пис давранырды».
