Шрифт өлчүсү:
А+
А
А-
30 Март 2017

Хәстәнин ҝөрүшүнә ҝетмәјин фәзиләти

Һәр кәс Аллаһын разылығы хатиринә хәстәнин ҝөрүшүнә ҝетсә...
Мүһәддисләр вә тарихчиләр мүхтәлиф мөтәбәр китабларда гејд едирләр:
Һәзрәт Рәсули-әкрәмин (с) вәфатындан сонра Әмир әл-мөминин Әлинин (ә) достлары Пејғәмбәрин (с) сәһабәләриндән бири олан вә Гәдир-Хум һадисәсиндә иштирак етмиш Зејд ибн Әргәмин јанына ҝедиб Гәдир-Хум һадисәсиндә Пејғәмбәрин (с) һәзрәт Әли (ә) һаггында бујурдугларына шәһадәт вермәсини истәдиләр. Анҹаг о, һөкумәт тәрәфиндән өзү үчүн тәһлүкә һисс етдијиндән Гәдир-Хум һәгигәтләрини ачыгламагдан бојун гачырды.
Бу һадисәдән бир мүддәт кечдикдән сонра Зејд хәстәләнди вә јатаға дүшдү. Һәзрәт Әмир әл-мөминин Әли (ә) онун хәстәләнмәсини ешитдикдә, ҝөрүшүнә ҝетди.
Зејд ибн Әргәм һәзрәтин нурани ҹамалыны ҝөрән кими деди: - Алгышлар олсун, Әмир әл-мөмининә! Мән онун һаггында һәгигәти демәкдән бојун гачырдым, амма о, мәндән нараһат олмасына бахмајараг ҝөрүшүмә ҝәлмишдир.
Имам Әли (ә) бујурду: - Еј Зејд! Мәнин үчүн јаратдығын о нараһатлыг инсанлыг вә јолдашлыг һаггыны јеринә јетирмәјимә, сәни хәстә олдуғун бир һалда зијарәт етмәјимә һеч вахт мане ола билмәз.
Һәзрәт сонра бујурду: - Һәр кәс Аллаһын разылығы хатиринә хәстәнин ҝөрүшүнә ҝетсә, хәстәнин јанында отурдуғу вахт Аллаһын рәһмәт вә лүтф сајәси онун үзәриндә олур. Хәстәнин јанындан дуруб ҝетмәк истәдикдә Аллаһ јетмиш мин мәләкә әмр едир ки, онун үчүн салам вә рәһмәт ҝөндәрсинләр. Аллаһын рәһмәти белә шәхсә шамил олур.
Имам даһа сонра бујурду: - Еј Зејд! Мән истәјирдим ки, белә бир фәзиләт мәнә шамил олсун, она ҝөрә дә сәнин ҝөрүшүнә ҝәлдим.

Гајнаг: “Мүстәдрәкүл-вәсаил”, ҹ. 2, сәһ. 3. “Дәаимул-ислам”, ҹ. 1, сәһ. 218. “Биһарул-әнвар”, ҹ. 81, сәһ. 288.

Һазырлады: Сејид Заһир


4695 بازدید
در حال ارسال اطلاعات...