Һәгигәти ҝөрән Зејнәб, мүсибәтләрин вә чәтинликләрин ҝөзәл вә һәгиги үзүнү ҝөрдүкдә, онлара јахшы ҝөзлә бахыр вә онларын гаршысында сәбр едир.
Һәгиги сәбри јалныз иманын јанында ахтармаг лазымдыр. Һәгиги сәбр едән дүзҝүн мөминдир. Иман вә сәбрин әлагәси о гәдәр сәмими вә бир-биринә бағлыдыр ки, рәвајәтләрдә онларын икисинин баш вә бәдән ифадәси илә адлары чәкилибдир.
“Сәбрин имана нисбәтән мөвгеји, башын бәдәнә нисбәтән олан мөвгејидир”. Бу тәбир иманын һәјаты вә мөмининин инкишаф вә тәрәггисинин, онун сәбринин сајәсиндә олдуғуну, сәбирсиз мөминин иманынын ҝет-ҝедә арадан ҝетмәсини бәјан едир. Иманла јашамаг вә өз вәзифә вә борҹуну јеринә јетирмәк сәбирсиз мүмкүн дејил. Бу сәбәбдән сәбр барәсиндә олан рәвајәтләри үч һиссәјә – итаәт бәрабәриндә олан сәбр, ҝүнаһ бәрабәриндә олан сәбр вә мүсибәт үз верән заман сәбр етмәјә бөлмүшләр. Аллаһа бәндәлик, Шејтан гаршысында дөзүм – һамысынын гаршысында сәбрә еһтијаҹ вар.
Мөмин инсанын јашајышында гаршылашдығы чәтинликләрин мүхтәлиф әсәрләри вар. Аллаһ јолунун чәтинликләри вә мүсибәтләринин гијмәтли әсәрләриндән бири инсанын инкишаф вә камиллијидир. Јәни, Алаһ јолунун чәтинликләри, һәмишә инсанын инкишаф сәвијјәсини формалашдырыр. неҹә ки, Имам Әли (ә) бујурур: Инсан иманын һәгигәтини бу үч хүсусијјәтә малик олмаса дәрк едә билмәз: Диндән хәбәрдар олмаг, чәтинликләрин гаршысында сәбрли олмаг вә јашајышыны идарә етмәкдә јахшы тәдбирли олмаг. Ҝөрүн ки, һәјат чәтинликләри гаршысында инсанын сәбр етмәси иманын һәгигәтини дәрк етмәјә зәминә јарадыр.
Аллаһ јолунда чәкилән чәтинликләр вә мүсибәтләрин башга бир тәсири ахирәтдә инсана нәсиб олан сәваб вә немәтләрдир. Имам Садиг (ә) белә бујурур: Аллаһ инсана һәјатын чәтинликләри, хәстәликләр, гоһумларын мүсибәти, игтисади проблемләр вә дүнја бәлалары илә өз нәзәр диггәтиндә јер верир ки, она сәбр вә әҹр әта етсин. Бәзән исә камиллик вә беһишт немәтләринә јетишмәк, јалныз һәјатын чәтинлик вә мүсибәтләриндән кечмәклә мүјәссәр олар. Бу барәдә бир рәвајәтә диггәт един.
Имам Садиг (ә) бујурур: Бәзән бәндәнин Аллаһ јанында дәрәҹә вә мәгамы олур. Лакин бәндә буну өз әмәлинин васитәси илә әлдә етмир. Буна ҝөрә дә Аллаһ ону хәстәлијә, фәгирлијә вә ја өвлад мүсибәтинә мүбтәла едир. Әҝәр бу бәлаларын гаршысында сәбр едәрсә Аллаһ она о дәрәҹә вә мәгамы верир. Бу имам Һүсејнин (ә) сөзләридир ки, өз јол јолдашларына бујурур:
«Билин ки, Аллаһ чәтинликләрә дөзмәклә бәндәләринә дәјәрли мәгам вә дәрәҹә верир».
Јашајышын ҝәтирдији чәтинлик вә мүсибәтләр үчүн дејилән гијмәтләрә нәзәр салмагла белә нәтиҹә алмаг олар ки, иманлы инсанлара үз верән мүсибәт вә чәтинликләрин ики ҹәһәти вардыр: Бири хоша ҝәлмәз вә пис олан заһири ҹәһәти, диҝәри исә чох ҝөзәл олан һәгиги ҹәһәти. Бу ҹәһәтдән дә рәвајәтләр, мүсибәтләри мөминләр үчүн илаһи һәдијјә вә төһфә кими танытдырыр.
«Чәтинликләр Аллаһ тәрәфиндән һәдијјәдир».
Одур ки, ҝөрүрүк Аллаһ пејғәмбәрләри вә өвлијалары, мүсибәтләрин ҝөзәл үзүнү ҝөрүрләр вә онун гаршысында тәслим вә разы олурлар. Јәни, мүсибәтин баш вермәси илә бағлы һеч бир шикајәт вә ҝилеј-ҝүзар олмадығындан әлавә разы вә шаддырлар.
Һәгигәти ҝөрән Зејнәб, мүсибәтләрин вә чәтинликләрин ҝөзәл вә һәгиги үзүнү ҝөрдүкдә, онлара јахшы ҝөзлә бахыр вә онларын гаршысында сәбр едир. Зејнәбин һәјаты һәмишә – ушаглығындан бәри, бөјүк мүсибәтләрлә јолдаш олуб, бабасы Пејғәмбәри әлдән вермәк мүсибәти, анасы Фатимәнин мүсибәтләри, атасы һәзрәт Әлинин (ә) шәһадәт мүсибәти, гардашы имам Һәсәнин (ә) шәһадәт мүсибәти вә Кәрбәланын сајсыз-һесабсыз үзүҹү мүсибәтләри ки, дүнјанын ән бөјүк мүсибәти сајылыр. Зејнәб бу мүсибәтләрлә сәбр вә дүшүнҹә илә гаршылашдығындан онун ады сәбрлә гоша чәкилир. Зејнәбин сәбрини өвладлары, гардашы, гардашы балалары вә башга гоһумларынын шәһадәтиндә мүшаһидә етмәк олар. Ханымын сәбрини сүдәмәр ушағын атасы Һүсејнин (ә) гуҹағында шәһид оларкән тамаша етмәк олар. Онун сәбрини имам Һүсејнин (ә) вә башга шәһидләрин ҹәсәдләри јанында имам Сәҹҹада (ә) үрәк-дирәк вә тәсәлли верәркән ҝөрмәк олар. Вә нәһајәт һәзрәт Зејнәб сәбринин әзәмәтини, онун Ибни Зијад гаршысында, бүтүн бу мүсибәтләрә ҝөзәл мөвгејини бәјан едәндә ҝөрмәк олар.
«Ҝөзәлликдән башга бир шеј ҝөрмәдим».
Аллаһын саламы олсун Зејнәби-Кубраја вә Аллаһ јолунун бүтүн фәдакарларына ки, Зејнәбдән дәрс алараг сәбр етмәји өз һәјат дәфтәрләринин сәрлөһәсинә јазыблар.
