ҸӘМИЈЈӘТИ БҮРҮМҮШ ИҸТИМАИÂ ГАНУНСУЗЛУГЛАРЫН ИСЛАҺЫ
Имам Һүсејн (ә) өз гардашы Мәһәммәд Һәнәфијјәјә јаздығы вәсијјәтнамәдә белә бујурмушдур: “Мән нә ҝәзиб доланмаг үчүн Мәдинәдән јола дүшүрәм, нә дә јер үзүндә зүлм едиб фәсад төрәтмәк үчүн. Мәним бу сәфәрим анҹаг ҹәддимин үммәти арасында ислаһат апармаг үчүндүр.”
Буна охшар тәбири о һәзрәт алимләрлә олан хүсуси ҝөрүшүндә дә бујурмушду: “Мән ислаһат фикриндәјәм, ону һәјата кечирмәк үчүн чалышырам.” Диггәт етсәк ҝөрәрик ки, һәр бир јердә “ислаһат” кәлмәси хүсуси вурғу илә ҝәтирилмиш, һәр дәфә хүсуси мәна гејд едилмишдир.
Имам бу чыхышы етдији заман һәлә Језид әлејһинә мүбаризә вә гијамдан әсәр-әламәт белә, јох иди. О һәзрәт бу чыхышынын ахырында дуа едир вә Аллаһа хитабән белә дејир: “Пәрвәрдиҝара! Сән өзүн билирсән ки, бизим мүбаризәмизин мәгсәди Сәнин дининин нишанәләрини вә Ислами мејарлары халга танытдырыб ҝөстәрмәкдир. Јәни, динин нә олдуғуну ҝөстәрәк вә һансы нишанәләрлә, һансы мејарларла диндар адамы динсизиндән ајырд едиб сечә билмәји танытдыраг. Һәмчинин бизим һәдәфләримиздән бири дә, Сәнин өлкәндә ислаһат ишләри апарыб, һәгигәти үзә чыхармагдыр.
