Ананын фикирләшмәси белә, бәтниндәки вә ја сүд вердији ушагда мүәјјән тәсир гојур
Әввәлдә дедијимиз кими, ушағын тәрбијәсиндә ананын ролу даһа чохдур. Чүнки ананын өвлад илә үнсијјәти атадан даһа чохдур. Алимләрин јаздыгларына ҝөрә, ананын фикирләшмәси белә, бәтниндәки вә ја сүд вердији ушагда мүәјјән тәсир гојур. Әҝәр ана ушағын бәтниндә олдуғу заманда, ислам гајда-ганунларына (әләл-хүсус һалал јемәк) риајәт етсә, мүтләг онун ҹәмијјәтә вердији өвлады да сағлам вә пак бир инсан олаҹагдыр. Инсанын ана бәтниндә икән хошбәхт вә ја бәдбәхт олмасыны билдирән һәдисин мәнасы да елә будур ки, ананын өз өвладынын неҹә шәхсијјәт олмасында бөјүк ролу вар. Мәтләбин даһа ајдынлашмасы үчүн ашағыдакы һәдисләрә диггәт јетирин:
Ислам Пејғәмбәри (с) бујурур:
«Һеч вахт ушагларыныза ахмаг вә ағылдан кәм гадын сүд вермәсин. Чүнки бу хасијјәтләр сүд васитәси илә ушагларыныза кечәр».
Имам Багир (ә) бујурур:
«Ахмаг гадынлар сизин ушағыныза сүд вермәсин. Чүнки сүд инсанын тәбиәтиндә әсәр гојур».
Имам Казимдән (ә) сорушдулар: «Зина јолу илә доғмуш гадына сүд вермәк үчүн ушаг верәкми?
İмам ҹавабында бујурду: «О гадынын вә онун зинадан доғулмуш гызынын белә сүд вермәси дүз дејил». (Фуруғи-кафи, 6-ҹы ҹилд, 44-ҹү сәһ )
Имам Әли (ә) бујурур:
«Гадынлары евләнәндә сечдијиниз кими, сүд вермәк үчүн дә сечин. Чүнки сүд ушағын тәбиәтини дәјишир».
Пејғәмбәрләрдән, Муса пејғәмбәрлә, Ислам Пејғәмбәринин (с) башга гадынлардан сүд әммәмәләри ону ҝөстәрир ки, инсанын һәјатынын биринҹи јемәји һалал вә пак јердән ҝәлмәлидир.
«Гәсәс» сурәсинин 12-ҹи ајәсиндә охујуруг:
«Мусаја анасынын дөшүндән савајы өзҝәнин дөшүнү әммәји өнҹәдән һарам етмишдик».
Тәфсирчиләрдән бәзиси бу ајәнин шәрһиндә белә јазырлар:
Муса пејғәмбәр ушаглыгда һеч бир сүд верән гадынын дөшүнү гәбул етмәди. О, өзүнү башга гадынларын гуҹағындан јерә атырды. Бу ишин сәбәби исә Аллаһын о гадынларын дөшләрини Мусаја һарам етмәси иди. Чүнки Аллаһ-тәала Мусанын һарам сүд јох, анасынын һалал вә пак сүдүнү әммәсини истәјирди. Она ҝөрә ки, сонралар Муса зүлм вә һагзызлыгла мүбаризә апараҹагды.
