Шрифт өлчүсү:
А+
А
А-
22 Ијун 2016

Садиг јухуну казиб (алдадыҹы) јухудан неҹә ајырд етмәк олар?

Бәзән јухулар нәфсин гурмаларыдыр. Белә јухулар “әзғаси әһлам”, јәни гармагарышыг вә пәришан јухулар адланыр.
Суал: Садиг вә казиб (алдадыҹы) јухулар арасында фәрг нәдир вә онлары неҹә ајырд етмәк олар? Мәсәлән: шејтан јухуда мәсум имамлардан (ә) биринин сурәтиндә заһир олараг инсаны алдада биләрми?

Ҹаваб: Садиг јухунун бәзән јозума еһтијаҹы јохдур. Һәзрәт Ибраһим (ә) јухуда оғлу Исмајылы (ә) зибһ етдијини ҝөрдү: “(Ибраһим) деди: “Оғлум! Јухуда ҝөрдүм ки, сәни гурбан кәсирәм”.
Бәзи садиг јухулар да вардыр ки, онлары јозмаг лазымдыр. Јәни хәјал гүввәси һәгигәти сурәт һалына салыр. Јухујозан бу хәјалы сурәти һәгиги мәнаја чатдыра билмәлидир.
Бәзән дә јухулар нәфсин гурмаларыдыр. Белә јухулар “әзғаси әһлам”, јәни гармагарышыг вә пәришан јухулар адланыр. Бунлар инсанын ҝүндәлик ишләринин тәсириндән јараныр. Она ҝөрә дә инсанын ҝөрдүјү јуху әҝәр мәсуму ҝөрмәк кими бирбаша олса, һагг вә доғрудур. Чүнки батилин о фәзаја јолу јохдур вә шејтан орада иштирак едә билмир (јәни шејтан мәсумларын сурәтиндә ҝөрүнә билмир).
Диҝәр јухуларын да садиг, јахуд казиб олмасыны маһир јухујозан бир сыра мејарлар әсасында ајырд едә билир.
Амма әҝәр бир кәс Пејғәмбәри (с), јахуд мәсум имамлардан (ә) бирини јухуда ҝөрсә, онларын өзләринин олдуғуну, јахуд шејтанын онларын сурәтинә дүшдүјүнү неҹә билмәк олар? Бу суалын ҹавабында хатырладаг ки, рәвајәтдә ҝәлиб: “Шејтан мәсум имамларын (ә) сурәтиндә заһир ола билмир”. (Сәдуг, “Әл-әмали”, сәһ. 62. “Биһарул-әнвар”, ҹ. 58, сәһ. 234-235.)
Амма мүшкүл будур ки, бизим чохумуз мәсум имамлары (ә) ҝөрмәмишик вә јухуда нурлу бир сима ҝөрсәк вә о симанын саһиби өзүнүн имам олдуғуну иддиа етсә, ону неҹә таныја биләрик? Һарадан ајырд едәк ки, рүбубијјәт иддиасы едән шејтан, нүбүввәт вә имамәт иддиасы да етмир?!
Демәли, һәр кәс мәсумлардан (ә) бирини һәјатда реал олараг ҝөрсә, сонра јухуда нурани бир сима мүшаһидә етсә вә ону таныса, бу јуху доғрудур. Амма танынмајан бир сима өзүнүн мәсумлардан бири олдуғуну иддиа етсә, ону ајырд етмәк чәтиндир. Чүнки бу јухуну ҝөрән шәхс бундан габаг реал олараг о мәсуму ҝөрмәмишдир вә шејтан јалан иддиа илә ону алдада биләр. Әлбәттә, јухарыда гејд етдијимиз кими шејтан мәсумларын (ә) сурәтиндә заһир ола билмәз. Амма рүбубијјәт иддиасы етдији кими нүбүввәт вә имамәт иддиасы да едә биләр.

Ајәтуллаһ әл-үзма Ҹавади Амули


6955 بازدید
در حال ارسال اطلاعات...