Һәгиги сәадәт одур ки, гүдрәтли мәбуд инсана нәзәр салыб ону өз мәрһәмәтинә гәрг етсин.
“Аллаһа јахынлыг” ифадәсинин мәнасыны даһа ајдын дәрк етмәк үчүн бәзи мадди вә һисси анлајышлардан истифадә етмәк олар. Јахынлыг ики мәнада ишләнир. Биринҹи мәнаја гашла ҝөзүн јахынлығыны мисал ҝөстәрмәк олар. Икинҹи мәнаја мисал олараг исә бири Кәрбәла, диҝәри Мәшһәддә јашајан ики достун гәлбән јахынлығыны ҝөстәрә биләрик. Әҝәр биринҹи мәнада мәкан јахынлығы нәзәрдә тутулурса, икинҹи мәнада мәнәви јахынлыгдан сөһбәт ҝедир.
İнсан бөјүк шәхсијјәләрлә мәнәви јахынлыгдан зөвг алыр. Мәсәлән, өлкә башчысы телевизија васитәси илә һәр һансы гәсәбә әһлинә өз мәһәббәтини билдирирсә һәмин бу гәсәбә әһли бундан мәнәви јахынлыг һисси кечирәрәк гүрур дујур. Амма елә инсанлар да вар ки, онлар јалныз Аллаһла јахынлыгдан ләззәт дујурлар. Неҹә ола биләр ки, ҝеҹ-тез торпаг әсири олаҹаг инсанла јахынлыгдан ләззәт алан шәхс варлыг аләмини бир “ол” демәклә ән ҝөзәл шәкилдә јаратмыш мәрһәмәтли Аллаһла үнсијјәтдән ләззәт дујмасын?! Әсл ифтихар бәшәријјәтин сәадәтини тәмин етмәк гүдрәтиндә олан бөјүк Јарадана јахын олмагдыр. Һәгиги сәадәт одур ки, гүдрәтли мәбуд инсана нәзәр салыб ону өз мәрһәмәтинә гәрг етсин.
Төвһид маарифинин меһвәри Аллаһа јахынлыгдыр. Бүтүн пејғәмбәрләрин тәлимләри бу меһвәр әтрафында топланмышдыр. Һәтта бүтпәрәстләр дә Аллаһла јахынлыға ҹан атмышлар. “Зумәр” сурәсинин 3-ҹү ајәсиндә бујурулур:
“Биз бүтләрә јалныз Аллаһа јахынлашмаг үчүн ибадәт едирик.” Ајә Мәккә мүшрикләринин дилиндән дејилир. Демәк, һәтта јолуну азанлар да бу јахынлыға ҹан атыр. Һәзрәт Әли (ә) бујурур: “Ҝөрмәдијим Аллаһа ибадәт етмәздим.” (“Биһарул-әнвар”, 4-ҹү ҹилд.) Әлбәттә, сөһбәт ади ҝөз јох, бәсирәт ҝөзү илә ҝөрмәкдән ҝедир. Һәзрәт Әли (ә) “Нәһҹүл-бәлағә”дә бу мәсәләјә тохунур: “Ҝөзләр Ону ашкар дәрк етмәз, амма гәлбләр Ону иман һәгигәти васитәси илә анлајар.”
