Јашадығымыз дөврдә өзүнәпәрәстишә јолухуб иманыны әлдән верән чох шәхсијјәтләр ҝөрмүшүк
Бүтүн күфрләрин әсасы өзүнәпәрәстишдир. Инсан ҝизли вә ја ачыг күфрүн һансы мәртәбәсиндәдирсә һәмин мәртәбәјә ујғун өзүнәпәрәстишә дүчардыр. Ҝөрдүјүмүз ишин тәкамүлә вә ја тәнәззүлә апардығыны тәјин етмәк үчүн бу ишин кимин истәји илә ҝөрүлдүјүнү мүәјјәнләшдирмәлијик. Аллаһын истәји илә ҝөрүлән иш исә инсаны тәкамүлә, нәфсин истәји илә ҝөрүлән иш сүгута апарыр. Бәзи мәртәбәләрдә өзүнәпәрәстиш о гәдәр ҝизли ола биләр ки, нәзәрдән јајынар.
Һәр һалда нәфсин һијләләринә гаршы диггәтли олмаг лазымдыр. Нәфс бәзән өзүнәпәрәстиши ҝизләмәк үчүн јаланчы мәнтиглә мүәјјән дәлилләрдән истифадә едир. Һәлә илк јаранышда Адәмә сәҹдә етмәкдән бојун гачыран Иблис Адәмә сәҹдәнин јанлыш аддым олмағыны дәлил ҝәтирмишди. Нәфс дә мүхтәлиф елми мәсәләләрлә инсаны алдада биләр.
Јашадығымыз дөврдә өзүнәпәрәстишә јолухуб иманыны әлдән верән чох шәхсијјәтләр ҝөрмүшүк. Онлар елми дәлилләр ҝәтирәрәк өз јанлыш фикирләринә һәгигәт дону ҝејиндирмәјә чалышырлар. Һәтта узун илләр дини мәркәзләрдә тәһсил аланлар арасында да нәфсин һијләсинә алдананлар тапылыр. Гырх ил дини елмләрлә мәшғул олан алим “иман јәгинлә бир араја сығмыр” иддиасы илә чыхыш едир. О, Гурана истинад едәрәк Гуранын зиддинә һөкм чыхарыр. Ҝуја, инсан јалныз билмәдији мәсәләјә иман ҝәтирә биләр. Һансы ки, Аллаһ-тәала ачыг-ашкар шәкилдә инам мәсәләсиндә зәнн вә ҝүманы мәзәммәт едәрәк инсанлары јәгинлијә чағырыр. Гуран инам мәсәләсиндә шүбһәни ејб кими танытдырараг јәгинлији олмајанлары зәиф дүшүнҹәли һесаб едир. “Нәмл” сурәсинин 66-ҹы ајәсиндә охујуруг: “Олсун ки, онларын ахирәт һаггында елмләри јетәрсиздир.”
