Quranla gəzən prezident hicab göstərişi verdi! (foto)

Qambiya dövləti büdcədən maliyələşən idarə və müəssisələrdə hicabı zəruri edib. Bundan sonra dövlət qurumlarında, idarələrində çalışan qadınlar hicablı olmalıdır. Bu barədə bütün nazirliklərə və idarələrə xəbərdarlıq məktubu göndərilib.
Adətən Quranla gəzən və Avropa ölkələrinə səfərdə əlində Quran olan prezident Yəhya Cammə Qambiyanı İslam Respublikası adlandırandan sonra dini kimlik məsələsi aktuallaşıb. Ölkə əhalisinin 95 faizi müsəlmandır. Qambiya Mavritaniyadan sonra Afrikada ikinci İslam Respublikasıdır.
Qambiya (Gambia) Qərbi Afrikada ərazicə ən kiçik ölkədir. Əhalisi 2 milyon nəfərə yaxındır. Şimaldan, şərqdən və cənubdan Seneqala qonşudur. Qərbdən Atlantik okeanı suları ilə əhatələnib. 1965-ci ildə Böyük Britaniyanın müstəmləkəçiliyindən azad olub. Paytaxtı Bancul şəhəridir. 1982-ci ildə Qambiya-Seneqal (Seneqambiya) Konfederasiyası yaradıldı. Konfederasiya 1989-cu ildə fəaliyyətini dayandırdı.