Кәрбәладан Куфәјә вә Куфәдән Шама гәдәр бүтүн јоллар әзијјәт вә чәтинликләрлә долу иди
Ашура карваны узун сәфәр вә чәтин бир јол кечдикдән сонра вә ганлы Ашура һәрәкатыны сәмәрәләндирдикдән сонра Мәдинәјә гајыдырды. Онлар нә гәдәр чәтин вә әзијјәтли ҝүнләр јашамыш вә нә гәдәр өмүр азалдыҹы мүсибәтләр ҝөрүб, дил јаралары ешитмишдиләр! Кәрбәладан Куфәјә вә Куфәдән Шама гәдәр бүтүн јоллар әзијјәт вә чәтинликләрлә долу иди. Куфәдә Ибни Зијадын мәҹлиси вә Шамда Језидин мәҹлиси, бүтүнлүклә һәр јер мәзәммәтлә долу иди. Артыг аләмләрин мүсибәтини чәкмиш, јорғун бәдәнли, сыныг гәлбли, дәрдли, гәмли мәзәммәт вә дил јарасы ешитмиш, амма ејни һалда етдији бөјүк иш үчүн, бәшәрин тарих вә мүгәддәратында әмәлә ҝәтирдији бөјүк дәјишиклик үчүн ифтихар вә баш уҹалығы һисс едән бу карван Мәдинәјә доғу һәрәкәтдәдир. Ҹамаатын Әһли-бејтин (ә) Шама дахил олдуғу вахтдакы шадлыг вә ҝүлүшү инди артыг пешиманчылыг вә ҝөз јашы илә әвәз олунмушдур. Ҹамаат өз ҝөз јашлары илә карваны мүшајәт едир вә өз наләләри илә Әбу Сүфјанын үнванына ләнәт ҝөндәрирдиләр.
Карван Нөманла бирҝә Мәдинәјә тәрәф дөнүр. Зејнәб һәмин карванла Мәдинәдән Мәккәјә доғру вә Мәккәдән дә Кәрбәла сәмтинә һәрәкәт етдији ҝүнү унутмурду. Һәмин карван ки, рәһбәри Һүсејн (ә) иди, Әббас вә Әлиәкбәр кими ај үзлү иҝидләри вә өзү илә бирҝә гардашы имам Мүҹтәбанын (ә) јадиҝары вар иди. Гардашы Һүсејнин (ә) арам вә нурани чөһрәси, Әббасын шүҹаәт вә вәфасы, Гасимин паклығы вә сәфасы, Әлиәкбәрин Пејғәмбәрә охшарлығы, вә с... Зејнәбин јаддашындан силинмирди.
