Ашура һадисәсинин мүсәлманларын сәадәтиндә, милләтләрин һагг јолунун ишыгландырылмасында чох мүһүм һәлледиҹи ролу олмушдур
Нәјә ҝөрә 1400 ил бундан габаг баш вермиш бир һадисәни јад едиб хатырламалыјыг? О һадисәнин хатирәси олараг мәрасимләр кечирмәлијик? Бу һадисә тарихин мүәјјән бир заманында баш вериб, кечиб ҝетмишдир.
Аҹы ја ширин, олан олду [өлән өлдү, галан галды] гуртарды, ҝетди. Нәјә ҝөрә үстүндән 14 әср кечдикдән сонра һәмән һадисәни бир даһа јаддашларда дирилдиб, онун үчүн мәрасим тутмалыјыг?
Бу суалын елә дә чәтин бир ҹавабы јохдур. Она ҝөрә ки, һәр һансы јенијетмәјә чох асанлыгла баша салмаг олар ки, һәр ҹәмијјәтин тарихиндә баш верән мүһүм һадисәләр, һәмин ҹәмијјәтин ҝәләҹәк мүгәддәратында бөјүк изләр гојуб, мүһүм рол ојнаја биләр.
О хатирәләрин јенидән јад едилмәси, һәгигәтдә һәмин һадисәләрин бир даһа бәрпа едилиб, хатирәләрдә јенидән ҹанландырылмасыдыр. Бунула да халг һәмин һадисәдән истифадә едиб, нәтиҹә чыхара билсин. Әҝәр фајдалы бир һадисә олмушдурса, өз јериндә мүсбәт тәсир вә бәрәкәт мәнбәји сајылыбдырса, онун јенидән тарихдә јад едилиб, ҹанландырылмасы да өз нөвбәсиндә бүтүн милләтләрин тарихиндә бир нөв кечмиш һадисәләри јад етмәк адәти вардыр. О һадисәләри уҹа тутуб, онлара еһтирам гојурлар. Истәр ҹәмијјәтләрин инкишафында мүсбәт ролу олмуш шәхсијјәтләр олсун; бөјүк алимләр, танынмыш ихтира саһибләри, истәрсә дә халгынын, милләтинин јолунда, азадлығы уғрунда сијаси-иҹтимаи сәһнәдә вурушмуш милләт гәһрәманлары. Дүнјанын бүтүн ағыл вә мәнтиг саһибләри белә бир шәхсијјәтләр үчүн хатирә ҝеҹәләри кечирир, мүхтәлиф тәдбирләр нәзәрдә тутурлар. Бу иш Аллаһын бүтүн инсанларын гәлбиндә јерләшдирдији ән мүгәддәс фитри истәкләрдән бири олуб, «Һаггы танымаг һисси»нә сөјкәнир. Она ҝөрә дә бу бүтүн инсанларын фитри истәји олуб, онлара хидмәт ҝөстәрмиш һәр кәсин әвәзиндә, тәшәккүрләрини билдирир, бир нөв һагларыны өдәмәк үчүн онлара миннәтдар олуб, хатирәләрини јад едирләр. Бундан башга, бу хатирәләрин јад едилмәси әҝәр ҹәмијјәтин сәадәтинә тәсири олубдурса, һәмин хатирәләри јад едәркән диҝәр тәсирли амили дә она артыра биләр. Бу һалда санки о һадисәләр өзү јенидән ҹанланмыш олур.
Билдијиниз кими Ашура һадисәси Ислам тарихинин бөјүк һадисәләриндән биридир. Бу һадисәнин мүсәлманларын сәадәтиндә, милләтләрин һагг јолунун ишыгландырылмасында чох мүһүм һәлледиҹи ролу олмушдур. Буна ҝөрә дә бу һадисә бизим нәзәримиздә олдугҹа дәјәрли вә өнәмлидир. Елә буна ҝөрә дә бу һадисәнин бир даһа јад едиб хатырланмасы, зеһнләрдә јенидән јашадылмасы, онун мүсбәт тәсириндән, бәрәкәтиндән индики ҹәмијјәтимиздә дә истифадә едиб фајдаланмаға сәбәб олур. Бу ҹавабы ҹаванларын вердикләри суалын гаршысында ҝәтирмәклә онлары гане едә биләрик ки, кечмишдә баш верән бәзи һадисәләрин јенидән јаддашларда бәрпа едилиб, јашадылмасы мәнтигли бир ишдир вә мүмкүндүр ҹәмијјәтин һансыса мәнафејинин вә хејринин тәминатчысы олсун. Неҹә ки, о заман бу һадисәнин әслинин о ҹәмијјәтә бөјүк тәсири, фајдасы олмушдур, еләҹә дә бу ҝүнүмүздә һәмин һадисәнин јад едилмәсинин паралел олараг мүсбәт тәсири ола биләр.
