Шүбһәсиз ки, мәсумлардан савајы кимсә ҝүнаһдан аманда дејил. Һамы ҝүнаһа јол верир, хәтаја дүчар олур. Һәтта арифләр, абидләр, ҝеҹә ибадәт едән тәгва саһибләри дә һансыса һәддә ҝүнаһа батыр.
Әҝәр инсан нәфс пәрдәләрини јыртыб өзүнү дүзҝүн дәјәрләндирә билсә, гаршысында бир јығын ҝүнаһ ҝөрәр. Әҝәр инсан ҝүндә бир ҝүнаһа јол версә, 50 иллик өмрүн јеткинликдә өтән 35 илиндә 12775 ҝүнаһа саһиб олар. Әҝәр ҝүндә бир јох, бир нечә ҝүнаһа јол верилсә, олдугҹа бөјүк рәгәм алынар. Инсан бу ҝүнаһ јүкүнү лазымынҹа дәјәрләндирдикдә хәҹаләт чәкир. Тарихдә охујуруг ки, бәзи өвлијалар белә бир һесабын ағрысындан дүнјаларыны дәјишмишләр. (Шејх Бәһаји, “Кәшкүл”, сәһ.356.)
Әҝәр һәзрәт Адәм (ә) бир ҝүнаһа ҝөрә беһиштдән говулдуса, минләрлә ҝүнаһа јол вермиш бизләри нә ҝөзләјир?!
Ҹәннәтдә јашарды бабамыз Адәм,
Сәҹдә гылынарды өнүндә һәрдәм.
Ҹәми бир ҝүнаһа јол вермиш икән
Çыхарылды әмин-аман беһиштдән.
Сәнсә мин ҝүнаһла еј үзүгара,
Ҝирмәк истәјирсән о ҝүл дијара.Бунунла белә, Аллаһ-тәала бизә иҹазә вермәјиб ки, Ондан үмидимизи үзәк. Гуранда бујурулур:
“Азғынлардан савај ким Аллаһын рәһмәтиндән үмидини үзәр?!” (Һиҹр сурәси, ајә 56.) Диҝәр бир ајәдә охујуруг:
“Јалныз кафирләр Аллаһын рәһмәтиндән үмидини үзәр.” (Јусуф сурәси, ајә 87.) Башга бир ајәдә Аллаһ-тәала ҝүнаһкарлара хитабән бујурур:
“Еј мәним өзүнә гаршы исраф вә ситәмә јол вермиш бәндәләрим! Аллаһын мәрһәмәтиндән үмидинизи үзмәјин, Аллаһ бүтүн ҝүнаһларынызы бағышлајар. Чүнки О, бағышлајан вә меһрибандыр.” (Зумәр сурәси, ајә 53.)
Әҝәр Гуран ајәләрини диггәтлә нәзәрдән кечирсәк, 276 мәгамда Аллаһын рәһмәтиндән данышылдығыны ҝөрәрик. 232 дәфә Аллаһын ғәфур олмасы, 35 дәфә әфв вә бәхшиш саһиби олмасы гејд едилир. Мәҝәр бүтүн ајәләр минләрлә ҝүнаһа јол вермиш инсана үмид вермирми? Бәли, инсан бүтүн ҹинајәтләринә бахмајараг Аллаһдан үмидини үзмәмәлидир.
Ичимдә бир үмид шөләси парлар,
Ҹинајәтим варса, үмидим дә вар.Шаир диҝәр бир мәгамда әмәл намәсини гара ҝөрсә дә, үмидини итирмәдијини билдирир:
Намәм гара дејә говма гапындан
Ҝөр башыма нәләр ачды бу дөвран.Шаир “Зумәр” сурәсинин 53-ҹү ајәсинә,
“Аллаһ бүтүн ҝүнаһларынызы бағышлајар” бујуруғуна истинадән бағышланаҹағына үмид бәсләјир:
Тәшвишә дүшмүшәм ҝүнаһларымдан,
Ҝүнаһым артыгды јағышдан, гардан.
Бағышланмаг вәди верилмәсәјди,
Бағрым јарыларды дүшүнән заман.
