32-ҹи Бејнәлхалг Гурани-Кәрим Мүсабигәси иштиракчылары илә ҝөрүшдә бәјанат
Ајәтуллаһ Хаменеи: Гуран тилавәти мүгәддимәдир, мәгсәд дејил!
Бисмиллаһир-Рәһманир-Рәһим
Әлһәмду лиллаһи рәббил-аләмин вәссәлату вәссәламу әла сәјјидина Муһәммәдин вә алиһиттаһирин.
Бүтүн әзиз гардаш вә баҹылара хошҝәлдин дејирәм. Гариләр, һафизләр, Гуран әһли, Гуранла үнсијјәтдә оланлар Гуран ајәләрини тилавәт едәндә һәгигәтән Гуран әтри һәјат фәзасыны бүрүјүр. Мән бу ҝөзәл мәрасими тәшкил едән, ону әрсәјә ҝәтирәнләрә тәшәккүр едирәм. Мөһтәрәм гариләрә, бу ҝүн програмы иҹра едәнләрә тәшәккүрүмү билдирирәм.
Үмир едирик ки, Аллаһ бизи Гуран әһли гәрар версин. Гуран әһли олмаг лазымдыр. Гуран тилавәти мүгәддимәдир, мәгсәд дејил. Мәгсәд Гуран әхлагы илә тәрбијәләнмәкдир. Пејғәмбәрин (с) мөһтәрәм зөвҹәләриндән нәгл олунуб ки, Һәзрәтин (с) әхлагы барәдә дејибләр: Канә хулгуһул-гуран... Пејғәмбәрин (с) әхлагы Гуран иди... (Нәһҹүл-бәлағәнин шәрһи, ҹ.6, сәһ. 320) Јәни Пејғәмбәр (с) мүҹәссәм, тәҹәссүм етмиш Гуран иди. Рәфтарымыз, әхлагымыз, шәхси сәҹијјәләримиз Гурана ујғун олсун. Бу лазымдыр. Тилавәт бу јолун мүгәддимәсидир. Тәкҹә бу да дејил. Гурана ујғун фәрди формалашмадан әлавә, ҹәмијјәтимиз, һәјат фәзамыз да гурансајағы олмалыдыр.
Јол вермәјин ки, ҹаһилијјәт өзүнү ҹәмијјәтимизә, һәјатымыза гәбул етдирсин. Һансы ки бу иш баш вериб. Бу ҝүн Ислам дүнјасы ҹаһил режимләрин тәзјиги алтында әзаб чәкир. Бу ҝүн Ислам дүнјасы зәифлик, јохсуллуг, ихтилаф, дахили мүһарибәләр јашајыр, онун бөјүк дахили мәнбәләри, енержиләри өз әлејһинә ишләјир. Бүтүн бунлары Ислам дүнјасына зорла гәбул етдирибләр. Гуран бизи бу тәзјигләрдән хилас етмәк истәјир. Буна мүвәффәг олмалыјыг. Гураны өјрәнәк, Гуранла үнсијјәт гураг, Гуран гаршысында тәслим олаг, Гурандакы мәгсәдләрә доғру һәрәкәт үчүн әзм вә ирадә ҝөстәрәк. Бу һалда баҹарарыг. Әҝәр бир аддым ирәли ҝетсәк, Аллаһ-Таала бизә икигат ҝүҹ верәр. Бу ҝүн мүсәлман халгларын дәрк етмәли олдуғу мәсәлә будур. Буну дәрк етмәлидирләр. Бир аддым атыб, сынајаг.
Биз буну јашадыг. Биз Иран халгы буну тәҹрүбәдән кечирдик. Ислам дүшмәнләри вә Гуран дүшмәнләри гаршысында тәслим олмадыг, мүгавимәт ҝөстәрдик. Аллаһ бизә ҝүҹ верди. Мүгавимәт ҝөстәрдикҹә ҝүҹүмүз артды, имканларымыз артды, ҝәләҹәјә үмидимиз артды. Бу, Ислам дүнјасына әлаҹ нүсхәсидир. Ислам дүшмәнләринин Ислам үммәти арасында һәмишә, бу ҝүн дә изләдији мәсәләләрдән бири ихтилаф, гаршыдурма јаратмагдыр. Бунун гаршысыны алмаг лазымдыр. Ихтилаф јарадан сөз данышан һәр ағыз дүшмәнин рупорудур. Өзү билсә дә, билмәсә дә, бу беләдир. Диггәтли олаг ки, ағызларымыз Ислам вә Гуран дүшмәнләринин рупору олмасын, ихтилаф һавасы чалмасын. Дини ихтилаф, шиә-сүнни ихтилафы, әрәб-әҹәм ихтилафы, өлкәләрарасы ихтилаф, милләт-тајфа ихтилафлары, милләтчилик тәәссүбләри мүсәлман ҹәмијјәтиндә шөләләндирилән ихтилафлардыр. Онларын гаршысында дајанмаг лазымдыр.
Бәли, бу сөзләри данышмаг асандыр. Онлара әмәл етмәк чәтиндир. Амма әмәл үчүн јол вар, јол ачыгдыр. Әсас амил бизим әзм вә ирадәмизидр. Гәрара ҝәләк. Бәсирәт вә әзм ики әсас амилдир. Әввәла, бәсирәтимиз олсун, досту-дүшмәни таныјаг. Бу ҝүн елә Ислам өлкәләри вар ки, онларын мәсулларынын бәсирәтиндә хәта вар. Досту дүшмәндән сечә билмирләр. Дүшмәни дост сајырлар, досту дүшмән. Беләҹә, инсан зәрбә алыр. Белә бир өлкә, белә бир бахышла зәрбәјә мәруз галыр. Бәсирәт лазымдыр. Гул һазиһи сәбили әду иләллаһи әла бәсирәтин әнә вә мәниттәбәәни... Де: Бу мәним јолумдур. Мән вә мәнә табе олан мөминләр ачыг-ашкар бир дәлиллә Аллаһа чағырырыг... (Јусуф, 108) Әҝәр бәсирәт олса, инсан јолу дүзҝүн таныјар. О заман әзм вә ирадә ҝөстәрсә јолу асанлыгла кечәр. Илаһи нүсрәт будур. Ин тәнсуруллаһә јәнсуркум... Бундан ајдын неҹә демәк олар?! Ин тәнсуруллаһә јәнсуркум вә јусәббит әгдамәкум... Әҝәр сиз Аллаһа јардым ҝөстәрсәниз, О да сизә јардым ҝөстәрәр вә сизи сабитгәдәм едәр. (Муһәммәд, 7) Аллаһын нүсрәти будур. Аллаһын јолуну танымаг, тапмаг, изләмәк, дүшмәнин фитнә, һијлә вә зоруна тәслим олмамаг! Гуран биз белә тәмин едир.
Бизим иллик Гуран топлантымыз һәмд олсун Аллаһа мүвәффәг топлантыдыр. Гуран тәдриҹән ҹәмијјәтимиздә өз јени һәјатыны тапыр. Гураны севәнләр, Гуранла үнсијјәтә гатыланлар, Гуранла мәнус оланлар һәмд олсун Аллаһа ҹәмијјәтимиздә артмагдадыр. Бизим Гуранын һифзи, тилавәти үзәриндә исрарымыза ирад тутмасынлар ки, бунлар әсас дејил. Биз дә билирик ки, әсас дејил, васитәдир. Бу васитәләрсиз Гурана јахынлашмаг олмаз. Гуран маарифи илә таныш олмајан, Гуран ајәләрини дүшүнмәјән, Гуранла үнсијјәтдә олмајан инсан Гуранла һәрәкәт етмәк истәдији ҹәмијјәтә неҹә јол ҝөстәрә биләр?! Зијалыларымыз, ҝәнҹләримиз Гуранла таныш олмалы, үнсијјәти ҝүҹләндирмәлидирләр. Дүшүнҹәјә Гуран маарифи сүзүлдүкдә дүшүнҹәдән бајыра чыхан да о олаҹаг. Зеһн Гуран маарифи илә зәнҝинләшдикдә инсанын дилиндә, әмәлиндә, гәрарларында, рәфтарларында өзүнү ҝөстәрәҹәк. Бу бизим изләјәҹәјимиз мәгсәддир. Өлкә мәсуллары Гурана ҹидди јанашсынлар. Бу мәсәләни кичик мәсәлә һесаб етмәсинләр. Гуран өјрәнмәк, Гуран тилавәти, Гуранла үнсијјәт јолунда олан сиз әзиз ҝәнҹләр бу јолу ҹидди шәкилдә изләјин. Гуран бизим үчүн ҝәләҹәји ишыгландырыр. Гуран бизә доғру јолу, сирати-мустәгими ҝөстәрир, бизи хошбәхт едир.
Дедик ки, бу ҝүн Ислам дүнјасынын зәифликләри чохдур. Амма хошбәхтликдән Ислам ҹәмијјәтиндә Ислам вә Гурана доғру һәрәкәт башлајыб. Мәнтәгә өлкәләриндә јашанан Ислам Ојанышы сәһнәдән чыхасы дејил. Бу ојаныш давам едәҹәк, иншааллаһ өз тәсирләрини ҝөстәрәҹәк. Ислам Ојанышы бир һәгигәтдир. Бу һәгигәт иншааллаһ һәр ҝүн даһа артыг өзүнү ҝөстәрәҹәк. Бәли, алимләрин икигат артыг вәзифәси вар. Зијалыларын, јазычыларын, тәләбәләрин, арашдырмачыларын, о ҹүмләдән халгын севдији сиз гариләрин вәзифәси икигат ағырлашыб. Гуранын сизи мүждәләдији јола халгы үмидвар едә билмәлисиниз.
Иншааллаһ, Аллаһ-Таала сизи мүвәффәг етсин, сизи өз јардымларындан бәһрәләндирсин. Иншааллаһ, мүсәлман дөвләтләри, мүсәлман рәһбәрләр сөздә јох, әмәлдә бир дәдәр Гурана јахынлашсынлар. Иншааллаһ, Ислам дүнјасы өз хошбәхт ҝәләҹәјини Гуран сајәсиндә әлдә етсин. Әссәламу әләјкум вә рәһмәтуллаһи вә бәрәкатуһ.
Vilayet.nur-az.com
