Әзизләрим, сәбирли олун, Аллаһ сәбр едәнләрләдир. Шејтан вәсвәсәләри сизә тәсир етмәсин. Әлбәттә ки, гијам вә етиразларыныз ҝөстәрди ки, шејтан сизин үмидинизи гыра билмир
Имам Хомејни (р) бујурур: Әзизләрим, сәбирли олун, Аллаһ сәбр едәнләрләдир. Шејтан вәсвәсәләри сизә тәсир етмәсин. Әлбәттә ки, гијам вә етиразларыныз ҝөстәрди ки, шејтан сизин үмидинизи гыра билмир. Сизи мәјус етмәк истәјәнләр шаһ вә гарәтчиләрин мәнафејини горумаг истәјәнләрдир. Онлары доғру јола чағырын. Тәслим олмасалар өзүнүздән узаглашдырын, мәјус един!
Şәрг вә Гәрб империалистләри Исламы мәһв етмәк, Ислам Ҹүмһуријјәтини сүгута уғратмаг үчүн әл-әлә вермишдиләр. Халг арасында ихтилаф јаратмағы чыхыш јолу сајырдылар. Бу фитнәкарлыгла халгы мәјус етмәк, өз чиркин мәгсәдләринә чатмаг истәјирдиләр. Аллаһын лүтфү илә бүтүн планлары позулду. Әҹнәбиләрә бағлы гүввәләр өз имансыз гәлбләриндә план ҹызырдылар ки, демократик республика гурсунлар. Һәтта Ислам ады алтында чалышыр, Америка Исламы форматында Ислама јер верирдиләр. Вәһдәт сајәсиндә онларын планлары алт-үст олду, мүвәффәгијјәтдән үмидләрини үздүләр...
Сизин әлиниздә тутдуғунуз шәкилләрдәки ҝәнҹләр Ислам вә Ислам мәмләкәти јолунда һәјатларыны гурбан вердиләр. Бу сизин үчүн ифтихардыр. Бу унудулмајаҹаг. Һәмд олсун Аллаһа ки, бу ҝүн Исламын кешијиндә сиз дајанмысыныз. Шаһ дөврү дејил ки, зәһмәтләриниздән биҝанәләр фајдалансын. Бу ҝүн нә гәдәр зәһмәт чәксәниз өз өлкәнизин хејиринәдир, Ислама хидмәтдир. Ислам о заман сәһнәјә ҝәлир ки, бу јолда фәдакарлыг ҝөстәрилир. Бу ҝүн сиз әзизләр бөјүк бир гәтијјәтлә дининизи, өлкәнизи, ләјагәтинизи горујурсунуз. Бу ҝүн сиз Уһуд, Хәндәк вә диҝәр ҹәбһәләрдә фәдакарлыг ҝөстәрәнләрин савабыны газанырсыныз. Ислам бир заман онларын әлиндә әманәт иди. Бу ҝүн исә сизин әлиниздә әманәтдир. Ҝүҹүмүз һәддиндә бу јолда чалышаг, Ислам сәрһәдләрини горујаг. Аллаһдан истәјирәм ки, сиз әзизләри даһа гәтијјәтли даһа ирадәли, јумругларынызы даһа сыхылмыш, ҹәрҝәләринизи даһа сых гәрар версин. Ҹанаварлар пусгуда дајаныб вә бүтүн ҝүҹләрини сәрф едирләр ки, бу өлкәни кечмишдәки вәзијјәтинә гајтарсынлар. Онлары мәјус един!
Залым дөвләтләр һәмишә башга өлкәләрә тамаһ салыр. Милләт сәһнәдә олмаса тәҹавүз едирләр, гијам галдырырлар. Халг сәһнәдә оланда бир иш ҝөрә билмирләр. Дүшмән баша дүшүб ки, халгымыз өз талејинә биҝанә дејил. Халгымыз вә ордумуз ҝүҹлүдүр. Өлкәни горуја биләрләр. Мүтәфәккир инсанлар халгын бирлијини горумалыдыр. Бу ҝүн милләт орду илә бирликдәдир. Әмин олун ки, дүнјанын һеч јериндә белә дејил. Орду ҹәнубда вә гәрбдә дөјүшүр, гоҹа гадын вә кишиләр ордуја көмәк едир.
Бу бирлик неҹә јараныб? Аллаһдан башга кимсә бу бирлији јарада билмәз. Орду өз севҝиси илә халгы ҹәзб етмәлидир. Орду вә милләт әл-әлә верәндә бөјүк ҝүҹләр мәјус олур. Нә заман халг, дөвләт вә орду арасында узаглыг јаранырса тәҹавүзкарларын үмиди артыр. Әҝәр халг дөвләтдән узагса бунун сәбәбкары дөвләт башчыларыдыр...
Мән әввәлдән демишәм ки, мејдана гәләбә үчүн дахил олмамышыг. Биз дини, виҹдани вә милли вәзифәмизи јеринә јетиририк. Һәмд олсун Аллаһа ки, Ислам ҹүмһуријјәтиндә бүтүн халг мүхалифләрин фикрини охујуб. Артыг үмидләри үзүлүб. Үмид едирик ки, бүтүн саһәләрдә, мүһарибәләрдә галиб ҝәләҹәјик. Биз мүһарибә әһли дејилик. Бир өлкәни тутмаг планымыз јохдур. Дүнја үчүн сүлһ вә тәһлүкәсизлик арзусундајыг. Иншааллаһ гәбул етдирилмиш мүһарибә дә баша чатар...
Бир ҝүн өлкәни гојуб гачанлар бу ҝүн сабитлик олдуғуну ҝөрүрләр. Ҝәлмәјә горхурлар. Чүнки ејш-ишрәт үчүн јашајырлар. Беләләри дүзәләси дејил. Артыг бу өлкәдә онлара јер јохдур.
Һәмд олсун Аллаһа ки, милләт әл-әлә вериб сечкиләрдә өзүнү ҝөстәрди. Бу сечкиләр сакитлилкә, уғурла баша чатды. Дүшмән араны гата билмәди. Мәјус олублар, әлләриндән бир иш ҝәлмәјиб. Чох јердә оғурлуг вар. Ән бөјүк оғурлуг Америкададыр. Биз ләјагәтсиз инсанлары өлкәдән говуб салеһләри иш башына ҝәтирән халга ҝөрә шүкр етмәлијик. Бу халга хидмәт един, онун проблемләрини арадан галдырын. Назирликләр, устандарлар халгын гајғысына галсын. Үмид едирик ки, иншааллаһ, бундан сонра сабитлик олар. Халг чалышар, сәрмајә јатырмагдан горхмаз. Артыг онларын сәрмајәси үчүн тәһлүкә јохдур. Әсас одур ки, үмидимиз Аллаһадыр, Онун фәзлинә ҝөз дикмишик. Аллаһ һамынызы һифз етсин...
Әмин олун ки, бу бирлији мөһкәмләндирсәк кимсә өлкәмизә тамаһ салмајаҹаг. Бир ҝүн сәрвәтләримизи гәсб етмәк истәјәнләр бу ҝүн мәјус олублар. Аллаһын бизә вердикләрини горујаг. Бу өлкәдә елә һадисәләр баш верди ки, бу һадисәләри илк бахышдан дәрк етмәк чәтиндир. Ингилабда истибдада ишләјән гүввәләр халга гошулду. Бу немәтин шүкрүнү јеринә јетирмәлијик...
Əҝәр һәр биримиз Аллаһын разылығы үчүн чалышырыгса анлашмаја ҝәләк. Тәблиғ олар, амма мәшрутәдәки кими олмасын. Дүшмәнин истәјинә ујғун олараг бир-биримизи вурмајаг. Сиз һамыныз истәјирсиниз ки, бу өлкәјә Ислам һаким олсун. Бу о заман мүмкүн олар ки, дүшмәнин фитнәләринә ујуб бир-биримизлә вурушмајаг. Мүзакирә едәк, разылыға ҝәләк, гој дүшмән мәјус олсун...
Бу ҝүн Ирандан чыхыб Ирана кәнардан бахан Инсан уғурларымызы даһа јахшы ҝөрүр. Әсас мәгсәд мәнәви мәсәләдир. Биз мүһарибә јох, мүгәддәс мүдафиә апарырыг. Исламын, мәмләкәтимизин, инсанларымызын ләјагәтини горумаг истәјирик. Белә бир мүдафиәни һәм Ислам һәм ағыл гәбул едир. Әҝәр өлкәнизә бири тамаһ салыбса бу ҹинајәткара гаршы мүдафиә мөвгеји тутмалысыныз. Дүшмән дајанмајыб. Јенә дә чалышыр. Амма мәјус олуб, уғур газанаҹағына үмиди галмајыб. Билин ки, бу ҝүн сиз ҝүҹлүсүнүз. Һәр бир инсан өз вәзифәсинә әмәл етмәлидир. Ганунда һәр биримиз үчүн вәзифәләр тәјин олунуб. Вәзифәмизә әмәл етмәлијик. Вәзифәмизә әмәл етсәк динимизин, өлкәмизин, инсанларымызын ләјагәтини горујаҹағыг...
Vilayet.nur-az.com
