Онлар нә етмәлидир, азад шәкилдә ачыг-сачыг вәзијјәтдә ҝәзиб-доланмалы, јохса һиҹаб вә өрпәк алтында әсир сахланылмалыдыр?
Сон дөврләрдә мүбаһисә мөвзусуна чеврилән мәсәлә гадынын ҹәмијјәт арасында јарымчылпаг вә ја өрпәклә заһир олмасында дејил, кишиләрин онлардан һансы шәкилдә ләззәт алмаларынын гануни олуб-олмамасындадыр. Кишинин һаггы вардырмы ки, һәр бир јердә һәр бир гадындан-зина истисна олмагла-баҹардығы гәдәр ләззәт алсын? Бу мәсәләнин әсил мәғзинә вә руһуна нәзәр јетирән Ислам дини бу суалларын ҹавабында гәтијјәтлә дајаныр. Шәриәт бахымындан кишиләр јалныз аилә мүһитиндә, издиваҹ чәрчивәсиндә вә бир сыра ағыр илтизамларла гадындан гануни һәјат јолдашы кими ләззәт ала биләр. Амма иҹтимаи мүһитдә јад гадынлара һәр һансы бир ҹинси вә интим мәгсәдләрлә јанашмаг гәти гадағандыр. Гадынларын да аилә мүһитиндән кәнарда кишиләрә бу мәгсәдлә јанашмасына һеч бир шәкилдә иҹазә верилмир.
Бәли, бурада белә бир суал гаршыја чыхыр ки, гадынлар нә етмәлидир? Онлар өртүклә чөлә чыхмалыдыр, јохса јарымчылпаг вәзијјәтдә? Јәни диггәт мәркәзиндә олан мәсәлә гадынларын өзүдүр. Бәзи һалларда бу мәсәләјә чох үрәк јананлыгла јанашылыр вә гадынларын һүгуг вә азадлығы ортаја атылыр. Онлар нә етмәлидир, азад шәкилдә ачыг-сачыг вәзијјәтдә ҝәзиб-доланмалы, јохса һиҹаб вә өрпәк алтында әсир сахланылмалыдыр?
Гејд едәк ки, мәсәләнин әсас мәғзи вә мәтләбин батини там башга бир шејдир. О да бундан ибарәтдир ки, ҝөрәсән кишиләр гадынлардан ҹинси бәһрәләнмәдә-зина истисна олмагла-ҹинси вә интим ләззәтләрдә мүтләг азадлыға маликдирләр, јохса јох? Јәни бурада фајдаланан кишиләрдир, јохса гадынлар? Ҹавабында демәлијик ки, бу мәсәләдә кишиләр гадынлардан даһа чох истифадә едирләр. Вилл Дорантын дедији кими: “Гадын палтарларынын гыса олмасы дәрзиләрдән башга һамы үчүн бир немәтдир.”
Демәли, әсас мәсәлә ҹинси ләззәтләрин аилә мүһити, гануни һәјат јолдашлары вә әр-арвад мүнасибәтләри илә мәһдудлашмасы вә ја бу ләззәтләрин иҹтимаи мәркәзләрә дә чәкилмәси илә әлагәдардыр. Ислам биринҹи фәрзијјәнин тәрәфдарыдыр.
Ислам нөгтеји-нәзәриндән ҹинси ләззәтләрин аилә мүһитиндә вә гануни һәјат јолдашы илә мәһдудлашмасы руһи тәсир бахымындан ҹәмијјәтин психоложи сағламлығына көмәк едир, мәишәт мүнасибәтләри бахымындан аилә үзвләри арасында рабитәләри мөһкәмләндирир, әр-арвад арасында исә там сәфа-сәмимијјәт бәргәрар едир. Иҹтимаи ҹәһәтдән арашдырдыгда да ҝөрүрүк ки, бу мәсәлә ҹәмијјәтдәки фәал вә ишҝүзар гүввәләрин горунуб сахланмасына, онлардан лазымынҹа сәмәрәли истифадә олунмасына сәбәб олур, гадынларын өз әрләри гаршысындакы вәзијјәтинә ҝәлдикдә исә, онун мәнәви дәјәринин јүксәлмәси илә нәтиҹәләнир.
Бизим нәзәримизә ҝөрә, Исламда өрпәјин сәбәб вә фәлсәфәси бир нечә шејдән ибарәтдир:
-Психоложи вә руһи сәбәбләр;
-Аилә-мәишәт мүнасибәтләри;
-Иҹтимаи сәбәбләр;
-Гадын һүгугунун горунмасы вә онун мәнәви дәјәринин јүксәлдилмәси.
Өрпәк һаггында садаланан јухарыдакы сәбәбләри изаһ етмәздән габаг гејд етмәлијик ки, Исламда һиҹабын мәншәји бир сыра үмуми вә әсаслы мәсәләләрдән ибарәтдир. Белә ки, Ислам нәзәриндән ҹинси ләззәтләрин бүтүн нөвләри-истәр бахмаг, истәр ләмс етмәк, истәрсә дә саир нөвләри-аилә мүһитинә мәхсус олмалы, әр-арвадлыг мүнасибәтләри чәрчивәсиндә вә гануни шәкилдә галмалы, иҹтимаијјәт исә тамамилә фәалијјәт вә әмәк мејданына чеврилмәлидир. Мүасир дөврдә иши вә фәалијјәтләри ҹинси ләззәтләрлә бир-биринә гарышдыран гәрб ҹәмијјәтләринә һаким олан системләрин әксинә олараг Ислам истәјир ки, бу ики мүһит бир-бириндән тамамилә ајры олсун.
Устад Мүтәһһәри
