11 Нојабр 2014
Ханым Зејнәб (с)
Инди Зејнәб, рәһбәри Сејјидүш-Шүһәда (ә) вә һимајәчиләри Аббас, Әлиәкбәр, Бәни Һашимин вә Имам Һүсејнин (ә) вәфалы сәһабәләри олан карвана башчыдыр. Һәмин кишиләр ки, карвандакы ушагларын, ханымларын үмиди вә сығынаҹаглары идиләр, онларын вүҹуду Әһли-бејтә тәссәли иди. Бу һимајәләр сајәсиндә Сејјидүш-Шүһәданын (ә) һәјатынын сон анларына гәдәр дүшмән хејмәләрә јахынлашмаға вә Әһли-бејтә бир шеј етәмәјә ҹүрәт етмирди. Әба Әбдиллаһын дөјүш анындакы «Ла һовлә вәла гүввәтә илла вә биллаһ» фәрјадлары онларын үрәјинә сакитлик бәхш едир вә онлара тәсәлли верирди.İнди, әзизләринин ән јахшысы шәһид олдугдан, гарәт олундугдан, хејмәләрә од вурулдугдан, дүшмәнин амансыз ҹәлладлығындан чәкилән әзаб-әзијјәт, изтираб вә пәришанлыглара дөздүкдән сонра вә шәһидләрин гана бојанмыш парча-парча олмуш ҹәсәдләринә тамаша етдикдән сонра, бу гәлби дағлылар бәшәр тарихи бојунҹа узанан бир һәрәкәт вә әбәдијјәт уҹалығы гәдәр фәрјад карванына бәнзәјирди. Бунлар ән бөјүк, ән илаһи бир гијамын мүждәчиләридирләр. Онун дәјәри Аллаһын ән јахшы мәхлуг вә вәфалы достларынын ганы илә верилибдир. Бу карванын рәһбәри имам Сәҹҹаддан (ә) сонра, Пејғәмбәрин ханәданындан олан бөјүк бир гадындыр ки, дағлар онун мөһкәмлији гаршысында һејрәтә ҝәлир. О, Әлинин рәшид гызы вә Фатимәнин елмли өвладыдыр ки, Бәни Үмәјјәнин зүлм вә ҹинајәт сарајларыны бир-биринә вуруб алт-үст едир. О, Зејнәбдир ки, өз Имамынын фәрманы илә Фатимәнин әзизләриндән ибарәт карвана бөјүклүк едир вә ән бөјүк мүсибәтләрә дөздүкдән сонра, Имам Һүсејн (ә) вә онун фәдакар достларынын ганлы хәбәрини инсанларын гулағына јетирир.
