Шрифт өлчүсү:

22 Октјабр 2014

Гаршыдан мәһәррәм ајы ҝәлир. Мәһәррәм ајы ики ҹәһәтдән диггәтәлајигдир: Бири тарихин бәнзәрсиз бир хатирәсини аным ҹәһәтидир. Бу јалныз мүсибәт, гәм вә кәдәрдә јох - әлбәттә ки, бу беләдир – һәм дә инсанын вә һагг тәрәфдарынын гәһрәманлығында вә үстүн ҹәһәтләринин ашкара чыхмасында бәнзәрсиз бир һадисәдир. Әҝәр сиз Имам Һүсејнин (ә) вәзијјәтинә бахсаныз, белә хүсусијјәтләрә малик олан бу һәрәкәтин вә гијамын бәнзәрсиз олдуғуну ҝөрәҹәксиниз. Гијамлар чох олмушдур, амма белә хүсусијјәтләрә малик олан бу гијам мисилсиздир. Чох дашүрәкли, һәјасыз вә һагсыз һөкмранлыг ҝүнбәҝүн ҝүҹләнирди. Һеч бир јахшы ишә дәвәт етмәк вә пис ишдән чәкиндирмәк мүмкүн дејилди. Мүһитдә горху вә тәзјиг о гәдәр ҝүҹлү иди ки, јахшы ишләрә дәвәт едән вә пис ишләрдән чәкиндирәнләр бу иттиһама мәруз галмамаға чалышырдылар.
Һәтта Абдуллаһ ибн Зүбејр кими чох ҹәсарәтли шәхсләр дә хилафәт апараты илә баш-баша ҝәлмәмәјә чалышырдылар. Јәни шәраит вә вәзијјәт бу гәдәр ағыр иди. Әмирәлмөмининин (ә) гардашы оғлу, күрәкәни вә ҹәнаб Зејнәбин һәјат јолдашы олан Абдуллаһ ибн Ҹәфәр кими бир шәхс дә хилафәтә јахынлашмаға чалышырды. Чүнки үмумијјәтлә бундан башга бир шеј тәсәввүр олунмурду.
Һәмчинин Абдуллаһ ибн Аббас кими бир шәхс тәҹрид һалында јашајырды, ҹәмијјәтдән кәнарлашыб тәклијә гапылмышды. Нәинки ади ҹамаат, һеч натиг вә данышан дилләр, дәјәрли шәхсијјәтләр, Бәни-Һашимин вә Гүрејшин бөјүкләринин өвладлары, еркән Ислам чағынын мәшһур ҝәнҹләри вә һәр биринин фәхрли кечмиши олан шәхсләр дә мејдана ҝирмәјә ҹүрәт етмирдиләр. Тәкҹә Шамда јох, һәтта Мәдинәдә дә вәзијјәт белә иди. Инди сиз Мәдинәнин вәзијјәтини мәркәз олмајан диҝәр јерләрлә мүгајисә един. Бу шәраит гәрибә шәкилдә горхунҹ вә гаранлыгдыр. О заман Имам Һүсејнин (ә) гијамы бу һөкмранлығы сындырмагдан өтрү баш верди, һакимијјәтә јијәләнмәк мәгсәди илә јох. Бәзи шәхсләр гијам едирләр, вурурлар, өлдүрүрләр ки, һакимијјәти әлә кечирсинләр. Амма Имам Һүсејнин (ә) гијамы бундан өтрү јох, јахшы ишләрә дәвәт етмәкдән вә пис ишләрдән чәкиндирмәкдән өтрү баш верди.
Бу иш үчүн ики нәтиҹәни өнҝөрәнлик етмәк олар: бири будур ки, гәләбә чалсын, диҝәри будур ки, о һәзрәтин имам елми олмадан да еһтимал етдији фаҹиәли шәкилдә өлдүрүлсүн. Бәли, ајдындыр ки, онлар һеч нәји нәзәрә алмырдылар. Имам Һүсејн (ә) белә бир шәраитдә әзиз Пејғәмбәрин (с) Мүбаһилә ҝүнү мәсиһиләрлә ҝөрдүјү иши ҝөрүр. Гурана әсасән, о, "өвладларыны", "гадынларыны" вә "өзләрини" мејдана ҝәтирмишди. Имам Һүсејн (ә) дә һәгигәти мүдафиә вә Аллаһ үчүн гијам етмәк мәгсәди илә өзүнүн ән әзизләрини вә бүтүн варлығыны мејдана ҝәтирди вә буна дөздү. Имам Һүсејнин (ә) бу дөзүмү чох әһәмијјәтлидир.