04 Мај 2018
ИЛАҺИ ВӘДЛӘРИН ҺӘЈАТА КЕЧМӘ ШӘРАИТИ
«Илаһи ҝөстәришләрә әмәл едәнләр бизим достумуз, етмәјәнләр исә дүшмәнләримиздир!»
Имам Садиг (ә) өз ардыҹылларына хәбәрдарлыг едир ки, шејтан илаһи вәдәләрин ҝерчәкләшмә шәраитиндән нәзәринизи јајындырмагла сизи алдада биләр. Тарихдә инсанларын илаһи вәдәләрдән дүзҝүн фајдаланмамасы факты чохдур. Мәсәлән, Бәни-Исраил Фирон тәрәфдарларынын ҹајнағында оларкән Аллаһ онлара вәд едир ки, иман ҝәтирсәниз хилас олаҹагсыныз. «Бәгәрә» сурәсинин 47-ҹи ајәсиндә бујурулур: «Еј Исраил өвлады, сизә бәхш етдијим немәтләрими вә сизи аләмдә хәлг олунмушлардан үстүн тутдуғуму јадыныза салын». Бәни-Исраил бу ајәдән белә нәтиҹә чыхармышды ки, даһа онлар үчүн ахирәт әзабы олмајаҹаг. Ујғун сурәнин 80-ҹы ајәсиндә Аллаһ-тәала бујурур: «Сиз Аллаһдан белә бир вәд алмысынызмы?!». «Маидә» сурәсинин 18-ҹи ајәсиндә исә белә бујурулур: «Јәһудиләр вә хачпәрәстләр дејир ки, биз Аллаһын оғуллары вә севимлиләријик. Онлардан соруш ки, бәс нә үчүн Аллаһ ҝүнаһларыныза ҝөрә сизә әзаб верир?» Бу ҝүн дә јәһудиләр өзләрини диҝәр милләтләрдән үстүн билиб онлара ағалыг етмәк үчүн план чызырлар. Мәсум имамларын дөврүндә дә «мурҹиә» адланан тајфа әзабдан гуртулмаг үчүн иман ҝәтирмәји кифајәт һесаб едирдиләр. Тәәссүф ки, Әһли-бејт (ә) ардыҹыллары арасында да белә јанлыш гәнаәтә ҝәләнләр дә вар. Бәзиләри елә дүшүнүр ки, ҹәһәннәм әзабындан гуртармаг үчүн Әһли-бејти севмәк кифајәтдир. Һәтта имам Багир (ә) вә имам Садигин (ә) дөврүндә дә беләләри олуб. Һансы ки, имам Багир (ә) бујурмушдур: «Илаһи ҝөстәришләрә әмәл едәнләр бизим достумуз, етмәјәнләр исә дүшмәнләримиздир!». («Биһарул-әнвар», ҹилд 70.)Инсанлары Әһли-бејт мәһәббәтинә дәвәт етмәкдә мәгсәд ҝүнаһ горхусуну гәлбләрдән чыхармаг дејил. Әҝәр Әһли-бејт јолу Аллаһа јахынлашма јолудурса, неҹә ола биләр ки, Әһли-бејти севән инсан ҝүнаһа бата?! Имам Багирин (ә) бујуруғундан белә нәтиҹә чыхармаг олар ки, Әһли-бејт мәһәббәти инсанын әмәл вә рәфтарындан һисс олунмалыдыр. Бир сөзлә «севирәм» демәк кифајәт дејил.
Имам Садиг (ә) Ибн Ҹүндәбә бујурур: «Бүтүн шиәләрә чатдыр ки, мәгсәдсиз вурнухуб јолу итирмәсинләр. Ҝүнаһдан чәкиниб, вәзифәләрә ҹидди әмәл етмәдән бизим вилајәтә јетишмәк олмаз. Вилајәтә јетишмәјин диҝәр шәрти мөмин гардашынын еһтијаҹыны арадан галдырмагдыр». Инсан өз сәадәти үчүн чалышдығы кими мөмин гардашынын сәадәти үчүн дә чалышмалыдыр. Еләҹә дә, башгаларына зүлм едән Әһли-бејт шиәси ола билмәз. Әһли-бејтә мәһәббәтин изһары, онлар һаггында шеир охујуб әзадарлыг етмәк, вилајәт әһли олмаг үчүн аздыр. Сөзсүз ки, бир дамла Әһли-бејт мәһәббәти дә гәнимәтдир. Амма һәгиги шиәлик үчүн тәкҹә мәһәббәт кифајәт дејил.
