30 Јанвар 2018
Пејғәмбәрә (с) ән севимли кәсләр
Пәрвәрдиҝара! Бунлар мәним әһли-бејтим (ә), мәнә ән севимли оланлардыр...
Әһли-бејт (ә) Аллаһын ән севимлиси олдуғу кими, пејғәмбәрин дә ән севимлисдир. Чүнки пејғәмбәр јалныз Аллаһын севдикләрини севир. Пејғәмбәрин тәвәлла вә тәбәррасы Аллаһын тәвәлла вә тәбәррасыдыр. Пејғәмбәр Аллаһа ҝөрә дост билир, Аллаһа ҝөрә дүшмәнчилик едир. Әһли-бејтин (ә) Пејғәмбәр (с) севимлиси олмасы онларын Аллаһа севимли олмасынын даһа бир дәлилидир. Үммү-Сәләмәдән нәгл олунур ки, бир ҝүн Пејғәмбәр (с) әјләшмишди, Фатимә (с.ә.) јемәк ҝәтирди. Пејғәмбәр (с) бујурду: “Әли вә онун ики оғлу һарададыр?” Фатимә (с.ә.) деди: “Евдә.” Пејғәмбәр (с) бујурду: “Онлары мәним јаныма дәвәт ет.” Әли (ә), ханым Фатимә (с.ә.) Һәсән вә Һүсејн (ә) Пејғәмбәрин (с) јанына ҝәлдиләр. Онлары ҝөрән Пејғәмбәр (с) јатагдакы әбасыны ҝөтүрүб ону Әли, Һәсән, Һүсејн, Фатимә илә бирликдә үстүнә чәкди. Һәзрәт деди: “Пәрвәрдиҝара! Бунлар мәним әһли-бејтим (ә), мәнә ән севимли оланлардыр. Һәр ҹүр чиркинлији онлардан узаг ет. Онлары там пака чыхар.” Бу вахт ајә назил олду: “Һәгигәтән, Аллаһ сиз Әһли-бејтдән (ә) һәр ҹүр чиркинлији узаглашдырмаг, сизи лајигинҹә паклашдырмаг истәјир.” (“Әһзаб”, 33)
Әмирәлмөминин (ә) бујурур: “Бир дәстә адам Пејғәмбәрин (с) јанына ҝәлиб деди: “Еј Аллаһын рәсулу! Сәнә ән севимли олан кимдир?” Пејғәмбәр (с) бујурду: “Бу ики өвлад вә онларын анасы. Онлар мәндәндир, мән дә онлардан. (Пејғәмбәр ики бармағыны бир-биринә јахынлашдырыб әлавә етди:) Бунлар беһиштдә мәнимлә бу вәзијјәтдәдирләр.” (Туси, “Әмали”, 452)
