10 Сентјабр 2017
Рәвајәтләрдә Әһли-бејтин (ә) мәсәли
Биз Әһли-бејт (ә) Һиттә гапысыјыг. Бу гапы саламатлыг гапысыдыр
Рәвајәтләрдә Әһли-бејт (ә) тәкҹә улдузлара вә ниҹат ҝәмисинә охшадылмыр. Һиттә гапысы: Һәзрәт Пејғәмбәр (с) бујурур: “Мәним Әһли-бејтим (ә) сизин үчүн Һиттә гапысы Бәни-Исраил үчүн олдуғу кимидир. Бу гапыдан ҝирән бағышланаҹаг.” (“Әл мәҹәмус-сәғир”, 2-22) Һәзрәт Әли (ә) бујурур: “Биз Әһли-бејт (ә) Һиттә гапысыјыг. Бу гапы саламатлыг гапысыдыр. Ондан дахил олан ниҹат тапды, ондан үз чевирән һәлак олду.” (“Әл-хисал”, 2-626) Һәзрәт башга бир мәгамда бујурур: “Аҝаһ олун! Адәмин ҝәтирдији елм, пејғәмбәрләри үстүн едән һәр билик сон пејғәмбәрин Әһли-бејтиндә (ә) вар. Бәс һараја үз тутмусунуз, һара ҝедирсиниз? Әһли-бејт (ә) сизин аранызда Әсһаби-кәһф, Һиттә гапысы кимидир. Онлар саламатлыг гапысы кимидирләр. Аллаһ онлары өз китабында белә јада салыр: “Еј иман әһли! Һамыныз тәслим һалына ҝәлин, шејтанын аддымларыны изләмәјин, о сизин ачыг дүшмәниниздир...” (“Бәгәрә”, 208; “Тәфсирул-әјјаши”, 1-102, һәдис 300)
Бејтуллаһ: Һәзрәт Пејғәмбәр (с) һәзрәт Әлијә (ә) бујурмушдур: “Еј Әли! Сиз Әһли-бејт (ә) бејтуллаһ (Кәбә) кимисиниз. Она дахил олан саламат галды. Сизи дост билиб јардым едән ҹәһәннәм одундан аманда галаҹаг. Сизә кин бәсләјиб дүшмәнчилик едән ода атылаҹаг. Еј Әли! Аллаһын китабына әсасән ҝүҹү чатана һәҹҹ ваҹибдир. Сәбәби олан үзүрлүдүр. Јохсулун үзрү онун јохсуллуғу, хәстәнин үзрү онун хәстәлијидир. Амма Аллаһ сизә мүнасибәтдә сәһләнкарлығы нә варлыдан, нә јохсулдан, нә хәстәдән, нә сағламдан, нә кордан, нә дә ҝөрәндән һеч бир үзрлә гәбул етмир!” (“Хәсаисул-әиммә”, 77)
Ҹисим үчүн баш: Һәзрәт Ислам пејғәмбәри (с) бујурур: “Мәним Әһли-бејтими (ә) ҹисминиз үчүн баш, башыныз үчүн ики ҝөз билин. Ҹисим башсыз јол ҝетмәз, баш ҝөзсүз јол тапмаз.” (Туси, “Әмали”, 482) Ајдын олур ки, Әһли-бејт (ә) ашигләри нә үчүн бу инсанлары өзләринә баш вә ҝөз һесаб етмишләр. Онлар бир ан олсун белә бу ешгсиз јашамамыш, Әһли-бејт (ә) маарифиндән әл чәкмәмишләр. Әһли-бејтсиз (ә) һәјат онларын ашигләри үчүн корлуг, азғынлыг, һејрәт, фәлакәтдән башга бир шеј дејил.
