01 Сентјабр 2017
ӘМР БЕ МӘРУФ ВӘ НӘҺЈ ӘЗ МҮНКӘР
Әмр бе мәруф вә нәһј әз мүнкәр кифаји-ваҹиб олан бир әмәлдир.
«Али-Имран» сурәсинин 104-ҹү ајәсиндә бујурулур: «Сизин аранызда јахшылыға чағыран (әмр едән) вә пис ишләрдән чәкиндирән (нәһј едән) бир үммәт олмалыдыр». «Әмр бе мәруф» дедикдә јахшылыға дәвәт, «нәһј әз мүнкәр» дедикдә пис ишләрдән чәкиндирмә баша дүшүлүр.İслам Пејғәмбәри (с) бујурур: «Нә гәдәр ки, үммәтимин арасында јахшылыға дәвәт едиб, писликдән чәкиндирәнләр олаҹаг, онлар хејир ичиндә јашајаҹаглар. Бу әмәл тәрк олунан кими илаһи бәрәкәт дә чәкиләҹәк. Инсанлар бир-биринә һаким олаҹаг, јердә вә ҝөјдә јардым тапылмајаҹаг».
Әмр бе мәруф вә нәһј әз мүнкәр кифаји-ваҹиб олан бир әмәлдир. Јәни, ҹәмијјәтдә бир груп инсан бу вәзифәнин өһдәсиндән ҝәләрсә, башгалары үчүн ваҹиб олмаз.
Бу ваҹиб дини вәзифәнин мәртәбәләри вардыр: гәлб, дил вә әмәл јолу илә. Инсан илкин мәрһәләдә јалныз гәлби илә мүхалифәт ҝөстәрмәлидир. Мәсәлән, ики достдан бири ҝүнаһа јол вердикдә, о бири дост сојуг мүнасибәт ҝөстәрмәклә етиразыны ифадә едир.
Нөвбәти мәрһәләдә инсан ҝүнаһа гаршы дил васитәси илә чыхыш едир. Бу ишдә руһаниләрин фәалијјәти мүстәсна әһәмијјәтә маликдир. Јетәрли билијә вә нитг габилијјәтинә малик олан инсанлар ҹәмијјәти ҝүнаһдан чәкиндирмәкдә, инсанлары салеһ әмәлләрә һәвәсләндирмәкдә даһа чох мүвәффәг олурлар.
Сон мәрһәлә әмәлидир. Бу мәрһәлә гәлб вә дил тәсирсиз олдугда тәтбиг олунур. Унутмаг олмаз ки, «әмр бе мәруф вә нәһј әз мүнкәр» ҹәмијјәтдә тәфригә јох, вәһдәт мәгсәди дашыјыр.
