12 Август 2017
МӘАД (ӨЛҮМДӘН СОНРАКЫ ҺӘЈАТ)
Бүтүн инсанлар өз руһларыны нә заманса Әзраил адлы мәләјә тәслим едәҹәкләр.
Гурани-Кәримдә јүздән чох ајәдә мәаддан, јәни өлүмдән сонракы һәјатдан данышылыр. Јараныш низамынын мәнтиги давамы олан мәада етигад Исламда бешинҹи әсас етигаддыр.İнсан бир дамла судан јарандығыны унудубму?! Доғруданмы һечдән јаранмыш бир мәхлуг гәбирдәки чүрүмүш сүмүкләрдән јенидән дириләҹәјинә инанмаја биләр?!
«О, јарадылышы башлајан, сонра ону бир даһа тәкрар едәндир. Бу иш Онун үчүн чох асандыр». («Рум» сурәси, ајә 27.) «…Ҝөјләри вә јерләри јарадан, бу јарадылышда аҹизлик ҝөстәрмәјән Аллаһ өлүләри дирилтмәјә дә гадирдир». («Әһгаф» сурәси, ајә 33.)
Мәадын инкары илаһи әдаләтин инкарыдыр. Әҝәр дүнја һәјаты өлүмлә сонуҹлансајды, һансы илаһи әдаләтдән данышмаг оларды?! Милләтләрин ганыны совуруб, уҹа имарәтләрини ал рәнҝә бојајан залымлар ҹәзаланмајаҹагса, һәгигәт јолунда фәдакарлыг нәјә лазыммыш?! Јох! Белә оласы дејил! «Һәр кәс зәррәҹә пислик етсә, ону ҝөрәҹәкдир». («Зилзал» сурәси, ајә 7-8.)
Бүтүн инсанлар өз руһларыны нә заманса Әзраил адлы мәләјә тәслим едәҹәкләр. Гәбир евиндә илкин сорғудан кечән инсан бәрзәх аләминдә мүвәггәти сығынаҹаг тапаҹаг. Вәд олунмуш ҝүндә гијамәт бәрпа олаҹаг вә ән ағыр сорғулар башланаҹаг. Вә нәһајәт, кими олдуғу әбәди беһиштә, кими инанмадығы әбәди ҹәһәннәмә говушаҹаг!
