Шрифт өлчүсү:

06 Декабр 2016

Мән Аллаһдан горхдуғум кими һеч бир кәсдән горхмурам

Бәни Үмәјјәјә гаршы галхмыш үсјанчылар өлдүрүдү вә бир нечәси әсир дүшдү. Үсјанчы әсирләр арасында Үммү Әлгәмә адлы бир гадын да вар иди. Ону Һәҹҹаҹын һүзуруна ҝәтирдиләр. Мәҹлисдә оланлардан бири деди: - Еј гадын, Һәҹҹаҹа итаәт едәрәк онун гаршысында тәзим ет. Јохса онун гәзәб вә әзабындан аманда галмајаҹагсан.
Гадын Гурани-кәримин бу ајәсини тилавәт етди: “Белә ола биләҹәји тәгдирдә мән (һагг јолдан) азар вә доғру јола јөнәлмишләрдән олмарам!” (“Әнам” сурәси, ајә 26)
Бу вахт Һәҹҹаҹ үсјанчы гадына деди: - Еј Аллаһын дүшмәни, өз гылынҹынла инсанлары өлдүрмүсән вә дүшүнүлмәмиш иш ҝөрмүсән.
Гадын она ҹаваб верәрәк деди: - Мән Аллаһдан горхдуғум кими һеч бир кәсдән горхмурам. Аллаһдан бу горхум мәним нәзәримдә сәни милчәкдән дә кичик вә хар етмишдир.
Гадын бу сөзләри дејәркән, башыны ашағы салмышды. Һәҹҹаҹ она деди: - Башыны јухары галдыр вә мәнә бах.
Гадын деди: Аллаһ Тааланын бахмадығы бир кәсә бахмағы хошламырам.
Һәҹҹаҹ мәҹлис иштиракчыларына хитаб едәрәк деди: - Еј Шам әһли! Бу гадынын гәтлә јетирилмәси барәдә фикриниз нәдир?
Дедиләр: - Ону өлдүрмәк иҹазәли вә ганыны төкмәк һалалдыр.
Гадын Һәҹҹаҹа деди: - Гардашынын јолдашлары вә мәҹлисинин иштиракчылары сәнин мәҹлисинин адамларындан даһа јахшы идиләр.
Һәҹҹаҹ деди: - Мәним гардашым кимдир?
Гадын деди: - Фирон. О, мәҹлис иштиракчылары илә һәзрәт Муса (ә) барәдә мәшвәрәт етдикдә, дедиләр: “Ону (Мусаны) гардашы (Һарун) илә бирликдә сахла”. (“Әраф” сурәси, ајә 111 вә “Шуәра” сурәси, ајә 36)
Бу сөзләрдән һиддәтләнән Һәҹҹаҹ онун гәтлинә фәрман верди. (1)
Һәҹҹаҹ, Бәни Үмәјјәнин сәркәрдәләриндән олмуш, чохлу ағыр ҹинајәтләр төрәтмишдир. Тарихчиләрин јаздығына ҝөрә о Ирага вали кими ҝөндәриләндә ҹамааты топлајараг бисмиллаһсыз хүтбә охумуш, Ираг ҹаматыны бәрк тәһгир етмиш, онлары тәфригәчи, нифагчы, ганичән адландырмыш, өлүмлә тәһдид етмишдир. Сонра да Бәсрәјә дөјүшә ҝетмәләрини әмр едиб демишди ки, һәр кәс бу әмрдән бојун гачырса, бојнуну вураҹаг, евини виран едәҹәјәм. Куфә гәбиләләринин башчыларындан олан Үмејр ибн Заби адлы бир гоҹа онун јанына ҝәлиб деди: Әмир! Мән бели бүкүлмүш, зәиф бир гоҹајам вә бир нечә ҝәнҹ өвладым мүһарибәдә иштирак едир. Онлардан бирини мәним јеримә һесаб ет вә мәни бу мүһарибәдә иштирак етмәкдән азад ет. Һәлә гоҹанын сөзү гуртармамышды ки, Һәҹҹаҹ әмр етди гоҹанын бојнуну вурдулар вә сәрвәтини, вар-дөвләтини мүсадирә етдиләр.
Тарихчиләрин јаздығына ҝөрә Һәҹҹаҹ дохсан бешинҹи (һ.г) илиндә 20 иллик һакимијјәтдән сонра өләркән бу мүддәтдә онун әмрилә гәтлә јетириләнләрин сајы (мүһарибәләрдә өләнләрдән башга) јүз ијирми мин нәфәри өтүрдү вә һәбсханаларында әлли мин киши вә отуз мин гадын вар иди. (2)
1. “Муһазиратул-удәба”, ҹ. 3, сәһ. 143.
2. Мәсуди, Мүруҹуз-зәһәб ҹ-3. сәһ-134. Ибн Әсир, Әл-Камилу фит-тарих ҹ-4. сәһ-34. Ибн әл-Ҹөвзи, Сәфинәтул-биһар ҹ. 1. сәһ. 222.

Һазырлады: Сејид Заһир