Шрифт өлчүсү:

29 Нојабр 2016

Имамларымыз (ә) гәдәр Аллаһ Рәсулундан (с) сонра төвһиди даһа чох тәблиғ едән икинҹи бир адам тарихдә зикр едилмәмишдир.

Аббаси шаһы Мәмун (л) Имам Рзаны (ә) ҹидди нәзарәт алтында сахламагдан өтрү Мәдинәдән Хорасана дәвәт етди. Имам Рза (ә) бу јолдан дөнүшүн олмадығыны билирди вә шиәләријлә сағоллашды. Нишапур шәһәриндән кечиб Мәрвә тәрәф истигамәт алан Һәзрәт Имам Рза (ә) аға јолун үстүндә карваны сахлајыб тарихдә "силсиләтуз-зәһәб" (гызыл зәнҹир) адыјла шөһрт тапмыш мүбарәк һәдиси-гүдсүнү сөјләди. Һәдисин бу ҹүр адланмасынын сәбәби будур ки, һәдисин сәнәдиндәки бүтүн фәрдләр мәсум имамларымыздыр (ә) вә илк Имам Әли (ә) да ону Ислам Пејғәмбәриндән (с) О Һәзрәт дә Аллаһдан нәгл едиб.

Мүбарәк һәдисдә Аллаһ бујурур:



Ла илаһә иллаллаһ кәлмәси мәним галамдыр, ким галама дахил олса әзабымдан аманда галар.

Даһа сонра карван јола дүшдүкдә Имам (ә) уҹа сәслә бујуруб:



Ла илаһә иллаллаһ кәлмәсинин шәртләри вардыр ки, мән онун шәртләриндәнәм.

Тәәссүфләр олсун ки, товһидә, Аллаһын вәһданијјәтинә, ла илаһә иллаллаһ кәлмәсинә бу гәдәр өнәм верән Имамларымызын (ә) гәбрләрини зијарәт едән шәхсләрә мүшрик, рафизи адлары гојулур. Һалбуки Имамларымыз (ә) гәдәр Аллаһ Рәсулундан (с) сонра төвһиди даһа чох тәблиғ едән икинҹи бир адам тарихдә зикр едилмәмишдир.

Һәзрәт Имам (ә) әслиндә бир неч мәсәләјә диггәт чәкир ки, шәһадәт ҝүнләриндә тәбәррүк үчүн гејд етмәк јеринә дүшәр.

1. Имам Рза (ә) өзүндән әввәлки пејғәмбәрләрин (ә) рисаләтини дирчәлдән, давам етдирән пејғәмбәрләр (ә) кими өз ҹәдди Рәсулуллаһын (с) рисаләтини дирчәлдир, товһид шүарыны бир даһа ҹиһад мејданындакы бајраг кими далғаландырыр. Бу исә О һәзрәтин (ә) миссијасынын мүбарәк олмасыны вә имамәтин рисаләтин давамы олдуғуну нишан верир. Һәзрәт Имам (ә) бүтүн мәхлугатын, инс вә ҹиннин Аллаһа хас олдуғуну, бүтүн јарадылыш аләминин Аллаһын бир зәррәси, нуру вә нишанәси олдуғуну билдирир. Бунунла да орадакыларын диггәтинә чатдырыр ки, анҹаг бу галаја пәнаһ ҝәтирән шәхсләр әзабдан аманда галаҹаглар.

2. Имам Рза (ә) карван јола дүшәндә мүбарәк башыны кәҹавәдән чыхарыб бујурур ки, бу кәлмәнин шәртләри вар, бу ҹүр дејил ки, һәр ким бу кәлмәни дилә ҝәтирсә әзабдан аманда галаҹаг. Ҝәрәк бу кәлмәнин шәртләринә әмәл едилсин. Бу кәлмәнин исә бир нечә шәрти вардыр. Чүнки һәдисдә кечән "шурут" сөзү "шәрт" сөзүнүн ҹәмидир ки, бу да шәртләр мәнасыны ифадә едир.

3. Имам Рза (ә) аға чатдырыр ки, бу шәртләрдән бири мәнәм. Әлбәттә, бу һәдиси гејд етдијимиз кими Һәзрәт (ә) өз аталарындан нәгл едиб ки, бу да гызыл силсилә шәкилиндә ҝедиб Аллаһ Рәсулуна (с) чатыр. О Һәзрәт (с) Ҹәбраилдән, Ҹәбраил дә Аллаһдан нәгл едиб. Демәли, Имам Рза (ә) аға бунунла изаһ едир ки, тәкҹә о јох, аталары да Товһид кәлмәсинин шәртләрдиндән бири олуб. Бунунла да Әһлибејтин (ә) бир даһа сирати мүстәгимдә олмасына диггәт чәкилир. Јәни, тәкҹә бу кәлмәни зикр етмәклә, Аллаһа вә пејғәмбәрләринә иман ҝәтирмәклә инсан әзабдан аманда галмаз. Ваҹибдир ки, пејғәмбәрләрин (ә) сонунҹусу олан Һәзрәтин Мүһәммәдин (с) үммәтә тапшырдығы Имам Әли (ә) вә онун өвладлары олан диҝәр имамларын (ә) һагг олмасына етигад едилсин. Товһидә инанҹ бунунла камил олур.

4. Имам Рза (ә) ағанын өзүнү, аталарыны, башга тәбирлә имамәти Товһид кәлмәсинин шәртләриндән һесаб етмәси зүлмә гаршы галдырдығы гијамдан хәбәр верир. Бу ҝүнүмүздә дә бәзи инсанлар вар ки, о заман бир чох имамларын залымлара гаршы гијам галдырмадыгларыны әсас ҝәтириб залым, зүлм әлејһинә силаһланмагдан чәкинирләр. Амма ҝәрәк унудулмасын ки, Имам Рза (ә) ағанын өзүнү Товһидин шәртләриндән һесаб етмәси нөвбәти бир Кәрбәланын месажыдыр. Јәни, нә гәдәр ки, бизим һаггымыз алынаҹаг, башгалары һаггымызы гәсб едәҹәк, бизә итаәт едилмәјәҹәк, һәмин инсанлар Аллаһын әзабындан аманда галмајаҹаг. Тәбии ки, бу да мәна етибарыјла зәманә шаһларына, вәзирләринә, мәгам-мәнсәб саһибләринә мејдан охумагдыр. Үстәлик нәзәрә алсаг ки, гылынҹла ҹиһад етмәјән имамлар (ә) һәр бириси залым хәлифәләрин әлијлә шәһид едилиб ајдын олур ки, онлар һеч дә зүлмүн габағында сакит отурмајыблар. Әҝәр сакит отурмуш олсајдылар һәр бириси Әбу Муса Әшәри, Шүрејһ гази кими сарај моллаларына чевриләрди.
Бу ҝүнләрдә Имам Рза (ә) ағанын мүбарәк һәрәми Аллаһ ашигләријлә долудур. Кәрбәладан јениҹә дөнән иман әһли Хорасан вилајәтинә (Мәшһәд шәһәринә) үз тутуб. Бу инсанлар тарих боју һаҹәтләр гапысы олан имамларымыздан (ә) бир чох кәрамәтләр ҝөрүб, ешидиб вә доғру јолда олмалары бир даһа онлара сүбут олунуб.

Аллаһдан арзу едирик бе һәгге Имам Рза (ә) аға агибәтимизи хәтме бехејр еләсин.