09 Октјабр 2016
Језидә бејәт етмәјә гаршы мүхалифәт
Куфә әһалисинин дәвәти олмасајды да, Имам Һүсејн (әлејһиссәлам) Језидә бејәт етмәјәҹәкди
Заман нөгтеји-нәзәриндән Имам Һүсејн әлејһиссәламын ингилабынын илк сәбәби, Језидин һөкумәти тәрәфиндән Имам Һүсејн әлејһиссәламдан бејәт истәмәк вә о Һәзрәтин бунунла мүхалифәти олмушдур. Тарихчиләрин дедији кими һиҹрәтин алтымышынҹы или рәҹәб ајынын он бешиндә Мүавијә өлдүкдән сонра Језид Мәдинәнин валиси Вәлид ибн Үтбә ибн Әбу Сүфјана мәктуб јазды ки Имам Һүсејн әлејһиссәламдан онун үчүн бејәт алсын вә бу иши әсла јубатмасын. (Әл-Иршад, сәһ.200.) Мәктуб чатан кими Мәдинәнин валиси Имам Һүсејн әлејһиссәламы чағыртдырыб ону мәсәләдән аҝаһ етди. Һәлә Мүавијәнин сағлығында Језидин вәлиәһдлији илә мүхалиф олан Имам Һүсејн (әлејһиссәлам) бу дәфә дә бејәтдән бојун гачыртды. Чүнки Језидә бејәт етмәк тәкҹә Језид кими алчаг бир шәхсин һакимијјәтини тәсдигләмәк дејил, һәм дә әсасыны Мүавијә гојмуш диктатура режими кими бөјүк бир бидәти тәсдигләмәк демәк иди.Мәдинәнин һакими тәрәфиндән бир нечә ҝүн тәзјигләр давам етди. Анҹаг бу тәзјигләр Һүсејн ибн Әли әлејһиссәламын мүгавимәтини гыра билмәди. Тәзјигләрин артмасы нәтиҹәсиндә Имам Һүсејн (әлејһиссәлам) рәҹәб ајынын ијирми сәккизиндә аиләси вә Бәни–Һашимдән олан бир дәстә илә бирликдә Мәдинәни Мәккә мәгсәди илә тәрк етди вә шәбан ајынын үчү Мәккәјә чатды. Шәһәрләр арасындан мәһз Мәккәни сечмәјин сәбәби оранын әмин-аманлыг јери олмасы иди. Бундан да әлавә, гаршыдан һәҹҹ мәрасими ҝәлирди. Һаҹыларын тез бир заманда Мәккәјә јығылаҹағыны нәзәрә алдыгда, бу шәһәр Имам Һүсејн әлејһиссәламын өз мәгсәдини мүсәлманлара чатдырмасы үчүн ән мүнасиб јер иди.
Имам Һүсејн әлејһиссәламын ингилабы бура гәдәр реаксија маһијјәти дашыјырды. Өзү дә гејри-шәри бир истәјә гаршы мәнфи реаксија. Чүнки Језид һөкумәти ондан зор ҝүҹүнә бејәт алмаг истәјир амма Имам Һүсејн (әлејһиссәлам) да буна разы олмурду. Һәр неҹә олур-олсун бу мәсәлә мәлумдур ки Имам Һүсејн әлејһиссәламы Куфә әһалиси дәвәт етмәздән габаг о Һәзрәт Језид һөкумәтинин тәзјигләринә гаршы мүхалифәт едирди. Әҝәр Куфә әһалисинин дәвәти олмасајды да, Имам Һүсејн (әлејһиссәлам) Језидә бејәт етмәјәҹәкди.
