24 Сентјабр 2015
Әмәл сөзүн тәсири үчүн шәртдир
Һәр бир мүсәлман өз рәфтары вә сөзү илә башгаларына тәсирли олмаға чалышмалыдыр.
Доғру мәзһәб тәблиғиндә тәблиғатчынын сөзү әмәли илә ујғун ҝәлмәлидир. Әҝәр нур тәдриҹән мүлајим шәкилдә башгаларына тәсир едирсә, од јандырыб-јахыр. Тәблиғат заманы од јох, нур кими олмаг лазымдыр. Түнд данышмагла динләјиҹијә әзијјәт вермәк олмаз. Мүлајим рәфтар инсана тәсир үчүн мүһүм амилдир. Имам Садиг (ә) бујурур: «Онлар (Әһли-бејт достлары) өз әмәлләри вә вар гүввәләри илә халгы бизә тәрәф дәвәт едирләр».Гејд едилдији кими, бәзән инсанын рәфтары башгаларынын она мејл етмәсинә сәбәб олур. Һәтта бу рәфтар диггәти инсанын данышығындакы зәиф ҹәһәтләрдән дә јајындырыр. Нәсиһәт заманы әмәлин тәсири данышыгдан һеч дә аз дејил.
Бизим вәзифәмиз Ислам ҝөстәришләринә фәрди сурәтдә әмәл етмәк дејил. Инсан үчүн ән бөјүк вәзифәләрдән бири башгаларыны доғру јола чағырмагдыр. Истәр руһани олсун, истәр гејри-руһани, һәр кәс өз гүввәси дахилиндә бу вәзифәјә әмәл етмәлидир.Â
Кор гујуја дүшән заман ҝөрән ҝөз,
Ҝүнаһкардыр, сусуб демәзсә бир сөз.
Јолуну азан инсанын әлиндән тутуб доғру јола чәкмәк һәр биримиз үчүн Аллаһын ваҹиб етдији вәзифәдир. Бу иш о заман мүјәссәр олур ки, нәсиһәт едәнин рәфтар вә әмәли дедији сөзләрә ујғун олсун. Һәтта әҝәр инсан ағзыны ачыб бир кәлмә сөз демәдән ҝөзәл рәфтар нүмајиш етдирсә, онун бу һәрәкәти әтрафындакылара чох тәсир едәр. Бәли, инсан аиләси, өвлады, достлары вә јахынлары үчүн нүмунә ола биләр.
İмам Садиг (ә) өз бујуруғунда сөзү тәсирсиз галан тәблиғатчылары долајы јолла гынајараг онларын тәблиғат заманы Әһли-бејт сирләрини ачмаларыны нөгсан тутур. Беләләри доғру үсулла тәблиғ әвәзинә Әһли-бејт сирләрини ачараг инсанлары аздырырлар. Һәр бир мүсәлман өз рәфтары вә сөзү илә башгаларына тәсирли олмаға чалышмалыдыр.
