Шрифт өлчүсү:

31 Август 2015

Әли Әсғәр Пурмәһәммәди Ајәтуллаһ Хаменеинин сүрҝүн дөврүнү хатырлајыр

Сејид Әли Хаменеинин Ираншәһрә сүрҝүн һөкмү шәмси 1356-ҹы ил, азәр ајынын 20-дә САВАК рәиси тәрәфиндән тәсдигләнир. Һөкм тәсдигләнәндән 8 ҝүн сонра Ҹәнаб Хаменеи үч һәрбчи илә Ираншәһрә ҝәлир. Орада сүрҝүн јолдашлары һөҹҹәтүлислам Әли Һөҹҹәти Кермани вә башгаларына гошулур. Ираншәһрдә јајда истилик 60 дәрәҹәдән јухары олур. Бу режимин мүхалифләри үчүн сүрҝүн заманы чәтинлик јарадан амил иди. 1357-ҹи ил, 11 тир рәҹәб ајынын 27-ҹи ҝеҹәсинә тәсадүф едирди. Һава әввәлки ҝүнләрдән фәргләнирди. Ираншәһр ҹамааты Ислам Пејғәмбәринин (с) Бесәт бајрамы мәрасиминдә иштирак етмәк үчүн Али-Рәсул мәсҹидинә үз тутмушдулар. Ајәтуллаһ Хаменеинин имамәти илә шам намазы гылынды. Намазын икинҹи рәкәтиндә хурма ағаҹларынын дартылмасына бәнзәр бир сәс ешидилир. Чох чәкмир ки, сел бүтүн Ираншәһри гуҹағына алыр. Бу һадисә заманы Ајәтуллаһ Хаменеи көмк үчүн јерли әһалинин сорағына ҝәлир, садә инсанлара көмәк әли узадыр. Бу һадисәдән сонра халг Ҹәнаб Хаменеини даһа јахшы таныјыр. Бу һадисәнин илдөнүмүнү бәһанә едәрәк һәмин илләрдә Ираншәһрә тез-тез јолу дүшән Әли Әсғәр Пурмәһәммәдинин ҝөрүшүнә ҝетдик. О Ҹәнаб Рәһбәрин Ираншәһрә сүрҝүн дөврүнү хатырлады.
Мәним Һәзрәт Аға илә танышлығым 1346-1347-ҹи илләрә тәсадүф едир. Ҹәнаб Хаменеи мүбарәк рамазан ајында тәблиғ үчүн Рәфсәнҹана ҝәлмишди. Бизим гонағымыз олду. Мәһз Рәфсәнҹана ҝәлмәсинин сәбәби атам Шејх Аббаспур Мәһәммәди илә танышлығы иди. Гонабадда, Кахәкдә, Ҹәнуби Хорасанда Фирдөвсдә зәлзәләдән зәрәр чәкәнләрә көмәк заманы таныш олмушдулар. Рәфсәнҹан ҹамааты атамын башчылығы илә Фирдөвс ҹамаатына көмәк үчүн бир нечә машыны јүк апармышды. О заман Ҹәнаб Хаменеи илә таныш олмушдулар. Һәмин ил ја нөвбәти ил Һәзрәт Аға Рәфсәнҹана ҝәлди. Сонра Рәфсәнҹана тез-тез ҝәлмәјә башлады. Биз дә Мәшһәддә онун евинә ҝедәрдик.
Рәфсәнҹанлыларын Һәзрәт Ағанын сөһбәтләриндән чох хошу ҝәлирди. О Рәфсәнҹанда ики дәфә минбәрдә сөһбәт етмишди. Бунун бири 1349 ја 1350-ҹи илләрдә имамәт мөвзусунда иди. Ҹәнаб Рәһбәр сөһбәтләриндә бујурурду ки, бизим бөјүк имамлар 250 јашлы бир инсан кимидир. Сөһбәтләр о гәдәр ҹазибәдар иди ки, ҹамаат мәҹлисдә нә гәдәр отурдуғуну јаддан чыхарырды. Мән һәмин сөһбәтләри лентә јазырдым. О заман САВАК ҝәлди, бүтүн лент јазыларыны алыб апарды. Икинҹи силсилә сөһбәтләр јарымчылыг галды. Мәҹлисләр давам етдији заман Мәшһәддән анасы хәбәр ҝөндәрди ки, гардашыны һәбс едибләр. Онун Мәшһәддә башга гардашлары олса да, бујурду ки, анам истәјиб, һөкмән ҝетмәлијәм. Ата-анасына мүстәсна еһтирам ҝөстәрирди. Дәфәләрлә сөзарасы хатырладырды ки, јол ҝедәндә еһтирам ҝөстәрәрәк атанызын архасынҹа ҝедин. Мәшһәддә евләриндә олдуғумуз заман шаһид идик ки, Ҹәнаб Хаменеи атасынын гаршысында дизи үстә отурур, атасына өлкәдә вә хариҹдә баш верән һадисәләрдән данышыр. Мәшһәдин әксәр алимләри билирдиләр ки, аға һәр ҝүн саат 9-10 арасы атасынын евиндә олур. Бизә төвсијә едирди ки, хејир агибәт истәјирсинизсә ата-ананыза мисилсиз һөрмәт ҝөстәрин.
1355-ҹи илдә тәһсилими давам етдирмәк үчүн Мәшһәд университетинә ҝәлдим. Аға мәнә тәклиф етди ки, онларын евиндә галым. Мән бир мүддәт ағанын евиндә галдым. Аға Теһрана ҝедәндә мән дә Мәшһәдин Нәвваб мәдрәсәсинә көчдүм.
Ајәтуллаһ Хаменеи Ираншәһрә сүрҝүн едиләндән сонра биз илк дәфә 1356-ҹи ил, бәһмән ајында ики университетдә тәтил заманы тәләбә јолдашларла вә достларла Ираншәһрә ҝетдик. Өзүмүзлә апардығымыз чантада јени еланлар вә бир нечә китаб варды. Гапыда кешикчи дајанмышды. Сорушду ки, киминлә ишиниз вар? Дедик ки, Ҹәнаб Хаменеи илә. Деди ки, полис идарәсинә ҝедиб кимлијимизи билдирмәлијик. Чантаны диварын башындан Ајәтуллаһ Хаменеинин һәјәтинә атыб полис идарәсинә ҝетдик. Јолда Һәзрәт Аға, Һашиминежад, Тәбәси, Һөҹҹәти Кермани вә даһа бир нәфәрлә растлашдыг. Беләҹә, бир һәфтә ағанын гонағы олдуг, сәфәр ҝөзәл кечди. Биз өзүмүзлә јени еланлар ҝәтирмишдик. Бу еланлары вә китаблары Фүрган групу јазмышды. Гуран сурәләрини тәфсир едирдиләр. Ҹәнаб Рәһбәр китабы вәрәгләјәндә елә илк сәһифәдә сәһв тутду. Бујурду ки, һәр кимдиләрсә чох савадсыздырлар, Исламдан бир шеј баша дүшмәјибләр. Мәсәлән, Фүрган групу Абдуллаһ ибн Үбәјји башга бир Абдуллаһла сәһв салырды. Бир сөзлә, јазыларында кифајәт гәдәр сәһв варды. Ҹәнаб Рәһбәр онларын еланларыны да охуду. Еланлары бәјәнмәди. Онлар јазырдылар ки, шаһла мүбаризәдә таҹирләр, руһаниләр, тәләбәләрлә бирләшмәк олмаз, мүбаризәдә тәҹрүбәли инсанлар олмалыдыр. Аға бујурду ки, ингилабда көмәкчиләримизин чох олмасынын нә зәрәри вар?! Аға буну ирад тутду. Бујурду ки, ким дејиб ки, ингилабы хүсуси бир груп етмәлидир?!
Ајәтуллаһ Хаменеи мүбаризәдә коммунистләр кими групларла бирләшмәјә мүхалиф иди. Мән Игтисадијјатын әсаслары адында бир китаб һазырламышдым, китабын үзү гырмызы рәнҝли иди. Бу китабы өзүмлә Ираншәһрә апармышдым, Ағаја тәгдим етдим. Ҹәнаб Рәһбәр китабы вәрәгләди, бујурду ки, бу китаб Марксын Капитал әсәринин хүласәсидир. Бујурду ки, бизим јолумуз фәрглидир, мәктәбимиз Ислам мәктәбидир, Ислам бајрағы бизим үчүн мүһүмдүр.
Нөвбәти сәфәримиз ҝәлән ил нөвруз ајында баш тутду. Атам Забула сүрҝүн едилмишди. Һәм атамын ҝөрүшүнә ҝетдик, һәм дә Хаменеи ағанын. Сојуг күләк әсирди. Мәнҹә, ҹәнаб Рашид Јәзди дә Ираншәһрә сүрҝүн едилмишди. Рәһими Хүррәмабади вә Мусәви Шали дә сүрҝүндә иди.
İраншәһрә үчүнҹү ил сәфәр заманы достларла гәрара ҝәлмишдик ки, Ираншәһрдән сонра Сәрәван, даһа сонра Пакистана ҝедәк. Мәни Рәфсәнҹанда һәбс етдиләр, бир ај һәбсдә галдым. Ајәтуллаһ Хаменеинин ата-анасы она мәктуб јазмышдылар вә јүкүмүн арасында һәмин мәктуб вар иди. Мәнә гаршы иттиһамлардан бири бу олду ки, сүрҝүндәкиләрлә әлагә үчүн васитәчилик едирәм. Азад оландан сонра Сәрәвана ҝетдим вә орада ешитдим ки, Ираншәһри сел басыб. Тәҹили Ираншәһрә үз тутдум. Тәгрибән евләрин 80 фаизи дағылмышды. Һәзрәт Аға селдән зәрәр чәкәнләрә көмәк үчүн Али-Рәсул мәсҹидиндә мәркәз јаратмышды. Ајәтуллаһ Сәдуги Јәзддән буғда ҝөндәрмишди. Рәфсәнҹандан да буғда ҝәтирилмишди. Халга илк јардым буғда иди. Ајәтуллаһ Хаменеи Пежо 404 маркалы машынла ҝәзиб селдән зәрәр чәкәнләри јохлајырды. Биздән сорушдулар ки, кимин сүрүҹүлүк вәсигәси вар? Тәкҹә мәним вәсигәм варды. Аға бујурду ки, јалныз вәсигәси олан шәхс машын сүрә биләр. О өзү машын сүрмәјәндә мән машын сүрүрдүм. Илк ҝүн селдән зәрәр чәкәнләрә баш чәкдик. Бизимлә бир јерли бәләдчи дә варды. Бәлуч дилиндә сорушурдуг ки, һансы евдә нечә нәфәр вар. Евдәки адамларын сајына ујғун купон верилир, аға купону имзалајырды.
Биринҹи ҝүн бу ишләри Аға јеринә јетирирди. Икинҹи ҝүндән һәмин иши мәнә тапшырды. Ҹәнаб Рашид Јәзди вә Рәһими Хүррәмабади илә бирликдә ҝүн доғандан јола чыхырдыг, ҝеҹә 11-ә гәдәр чалышырдыг. Бизимлә бир руһани ҝедирди ки, бу көмәјин кимин тәрәфиндән олдуғуну халга чатдырсын. Ҹәнаб Рәһбәр өзү халгла ҝөрүшдә тәкрарлајырды ки, биз ингилабчы руһаниләрик вә Ајәтуллаһ Хомејнинин (р) тәрәфдарларыјыг. Билдирирди ки, мәркәзимиз Али-Рәсул мәсҹидидир. Ираншәһр әһалисинин әксәријјәти сүннә әһли иди. Ҹәнаб Рәһбәр чалышырды ки, һәр заман Али-Рәсул мәсҹидиндә олсун вә сүнни-шиә ихтилафына јол вермәсин. Ајәтуллаһ Хаменеи ингилабдан әввәл ики мәзһәб арасында вәһдәтә чалышыр, ифратчылара етираз едирди. Бујурурду ки, диндә парчаланма јаратмамалыјыг.
İраншәһрдә селдән зәрәр чәкәнләрә Гумдан да көмәк ҝәлирди. Бу көмәкләрә Ајәтуллаһ-Үзма Ҝүлпајигани рәһбәрлик едирди. Јәзддән ҝәлән көмәкләрдә Ајәтуллаһ Сәдугинин ролу чох иди. Кермандан, Рәфсәнҹандан буғда, јағ, чај ҝәтирилирди. Биз Ағанын ҝөстәриши илә 10 ҝүн мүддәтиндә бүтүн Ираншәһр әһалисинә јардым чатдырдыг. Һәтта јохсул адамларын чох олдуғу башга шәһәрләрә дә көмәк едирдик.
Ајәтуллаһ Хаменеи ардыҹыл шәкилдә тапшырырды ки, халгла сәрт рәфтар етмәјин, меһрибанлыг ҝөстәрин. Өзү Ираншәһр әһлинә о гәдәр мәһәббәт ҝөстәрмишди ки, сүнни алимләри, мөвләвиләр, мүәллимләр онун мүриди олмушду.
Һәзрәт Аға сүннә-әһлинин китаблары илә, тәфсирләрлә, әрәб дилли шаирләрин әсәрләри илә таныш иди. Бу она көмәк едирди ки, сүнни алимләри илә сых рабитә јаратсын. Хатырлајырам ки, рәбиүл-әввәл ајында Аға бизә бујурду: “Бурада сүннә-әһли Пејғәмбәрин (с) мөвлудуну ајын 12-дә кечирир. Биз шиәләр исә 17-дә гејд едирик.” Бујурду ки, мәсҹиддә һәм ајын 12-дә, һәм дә 17-дә мәрасим гураг. Сонра ики ҝүн арасы бајрам мәрасимләри давам етдирмәк нәзәрдә тутулду. Пејғәмбәрин (с) мөвлуд мәрасимләри ајын 12-дән 17-ә гәдәр давам етди.

Vilayet.nur-az.com