Шрифт өлчүсү:
А+
А
А-
11 Ијун 2018

Һәбсхана диварлары һаггында дүшүнҹәләр

Дашын-диварын ҹаны, руһу, ҝөзү, дили олмаса да… гулағы вар!..
Елдәниз Гулијев

Режимин зинданларында мин бир әзијјәтә гатлашан әвәзолунмаз Ҝөзәл Бајрамлымызы, еләҹә дә диҝәр виҹдан вә сијаси мәһбуслары дүшүнәркән…

Үрәјимнән бир нечә кәлмә һәбсхана диварлары һаггында јазмаг кечди…
Бәли, мәһз һәсхана диварларындан. О диварлардан ки, нечә-нечә ағласығмаз вә дәһшәтли һадисәләрин “иштиракчысы” олуб. Ҹансыз иштиракчысы. О диварлардан ки, көврәк үмидләрлә јоғрулан, ағры вә әзабларла долуб-дашан инсан дујғуларынын бүтүн чаларларына шаһидлик едиб… Адамы һејрәтә салан гәрибә вә гәрибә олдуғу гәдәр дә гаибанә олајлар, әһвалатлар “ҝөрүб”.
Јох, диварларын ҝөзү олмур… Онун һеч һисс-һәјаҹаны да олмур… Диварлар, садәҹә, ҝөрүб-ешитдикләрини өз даш ҹанларына чәкиб һопдура билирләр, вәссалам.
Амма ҝөрән онлар, зәррә гәдәр дә ҝүнаһы, ҹинајјәти олмајан бојнубүкүк инсанларын аһ-наләсини, һарајыны ешидибләрми?.. Ҝөрән о дашлар шәрләниб тутулан мәсум инсанларын ганлы ҝөз јашларыјла јаздығы мәктубларын фәрјадына әкс-сәда вериблиәрми?! Ҝөрән онлар, һеч бир ҝүнаһ ишләтмәмиш мәһбусларын сәрҝиләдији әзм, гүрур, ҹәсарәт вә гәһрәманлыг нүмунәсиндән һејрәтә ҝәлибләрми? Вә ҝөрән, ҹансыз-руһсуз о дашлар инсан сатгынлығындан; хаинликдән, горхудан, һирсдән-һиккәдән, дәрддән-севинҹдән диксиниб дә “һәјаҹанланыблармы” һеч?.. Бу даш-диварлар нә гәдәр дашүрәкли адамлар, нә гәдәр чиликләнмиш үмидләр, хынҹым-хынҹым олмуш арзу-истәкләр, нә гәдәр биҝанәлик, ријакарлыг, лагејдликләр ҝөрүбләр, Аллаһ!..
Дашын-диварын ҹаны, руһу, ҝөзү, дили олмаса да… гулағы вар!.. Әлбәттә вар! Вә бәлкә дә, бу гулаглар чарәсиз ИНСАН инилтиләри, әзаб ичәрисиндә говрулан ИНСАН бағыртылары ешитмәкдән кар олублар… вә бәлкә елә, кар олдуглары үчүн даныша да билмирләр,- лалдылар!..
О диварлар ади диварлар дејил… О диварлар мәнәвијјат ишығымызын өләзимәмәси, руһумузун һалалҹа динҹлији үчүн, әхлагымызын ашынмаја дүчар олмамасы, нәһајәт, бизләрин ләјагәтли, иманлы, шәрәфли јашаја билмәси үчүн, өз ҹанларындан кечмәјә һазыр олан нечә-нечә гардаш-баҹымызын,баламызын јорғун күрәјини сөјкәдији диварларды…
Бу дүнјада һеч нә бошуна дејил, һеч нә. Һәтта ағыздан чыхан вә гејри-мадди сајылан СӨЗ дә һардаса донур, сыхылыб-бәркијир- маддиләшир. Аллаһым, дејирәм, бәлкә јер үзүнүн һәбсхана диварлары елә о маддиләшмиш “Аһ”-ларла аҹы ҝөз јашларынын гарышығыннан һөрүлүр?.. Беләдирсә, онда нә вахтса о дашлар, һәмин о диварлары һөрәнләрин башына јағаҹаг!.. Ҝүнаһы-сучу-ҹинајјәти олмајан инсанлары зинданларда – дөрд дивар арасында чүрүдәнләр билмәлидиләр: онлар ҹәзадан јајына билмәјәҹәкләр. Бир ҝүн о дашлар онларын башына дүшәҹәк. Мүтләг дүшәҹәк!.. Чүнки буну ИЛАҺЫ ӘДАЛӘТ тәләб едир.
Һәр шеји инкар еләмәк олар… ИЛАҺИ ӘДАЛӘТДӘН савајы!


349 بازدید
در حال ارسال اطلاعات...